Փաստ ինֆո

Նիկոլ Փաշինյանն այսօր խորհրդարանում մանրամասնել է, թե հայկական կողմը Հայաստան-Ադրբեջան սահմանագոտում իրավիճակի կարգավորման վերաբերյալ առաջարկների ինչ փաթեթ է ներկայացրել Ադրբեջանին, նաև պարզաբանել է՝ ինչ է նշանակում զորքերի հայելային հետքաշում:

Փաշինյանը հիշեցրեց, որ դեռևս 2021թ-ի նոյեմբերի 26-ին Սոչիում ընդունված եռակողմ հայտարարության մեջ արձանագրված է, որ Հայաստանը և Ադրբեջանը պայմանավորվում են քայլեր ձեռնարակել՝ հայ-ադրբեջանական սահմանին անվտանգության և կայունության բարձրացման ուղղությամբ և գործը տանել դեմարկացիայի և դելիմիտացիայի հարցով երկկողմ հանձնաժողովի ձևավորման.

«Մենք, քանի որ շահագրգռված ենք այս առումով և պետք է տեր կանգնենք մեր պայմանավորվածությանը, առաջարկել ենք, որ երկու երկրների զինված ուժերը պետք է հայելային հետ քաշվեն»,-ասաց նա:

Իսկ թե ի՞նչ է նշանակում հայելային հետքաշում, Նիկոլ Փաշինյանը պարզաբանեց, որ երկու երկրների Զինված ուժերը հայ-ադրբեջանական սահմանգծից հավասար հեռավորության վրա պետք է հետ քաշվեն, որից հետո սահմանի պահպանությունը պետք է հանձնվի սահամափակ թվով սահմանապահ ծառայողների, միաժամանակ պետք է տեղի ունենա միջազգային մոնիթորինգ՝ ձեռք բերված պայմանավորվածությունները իրագործելու համար:

Նիկոլ Փաշինյանը նաև հայտարարեց, որ Հայաստանի և Ադրբեջանի միջև գոյություն ունի պետական սահման, քանի որ դեռևս խորհրդային ժամանակներից գոյություն է ունեցել սահման, որը դելիմիտացիայի է ենթարկվել, իսկ 1991թ-ի ԱՊՀ համաձայնագրով, որը վավերացվել է Հայաստանի և Ադրբեջանի խորհրդարանների կողմից, երկու երկրները ճանաչել են միմյանց սահմանները.

«Հետևաբար, մենք կարծում ենք, որ պայմանավորվածությունները պետք է իրագործվեն այս տրամաբանությամբ, մենք պատրաստ ենք լսել նաև այլ առաջարկներ»,-ասաց նա:

Ըստ Նիկոլ Փաշինյանի՝ այս թեմայով անհիմն շահարկումները շատ են, հատկապես՝ այն առումով, թե սահմանագծման և սահմանազատման արդյունքում շատ գյուղեր անպաշտպան են մնալու։

«Չկա նման բան, առաջարկների փաթեթում ամեն ինչ հաշվի է առնվել»,-ասաց նա:

Նիկոլ Փաշինյանը նաև նշեց, թե առաջարկների այն փաթեթը, որը հայկական կողմը ներկայացրել է Ադրբեջանին 100%-ով կոմֆորտ չէ Հայաստանի համար, ինչպես նաև դիսկոմֆորտ չէ Ադրբեջանի համար.

«Հայաստանի և Ադրբեջանի միջև կա սահմանային գիծ, ըստ դրա հետքաշում պետք է տեղի ունենա»,-ասաց Նիկոլ Փաշինյանը:

Աղբյուր` Փաստինֆո