Փաստ ինֆո

Ադրբեջանի մշակույթի նախարար Անար Քերիմովի հայտարարությունը վկայություն է այն բանի, որ փորձ է արվում ուղղակի ջնջել հայ ժողովրդի ներկայության հետքերը Լեռնային Ղարաբաղում և ընդհանրապես պատմական հայրենիքում։ Այս մասին խորհրդարանում հայտարարեց ՀՀ արտգործնախարար Արարատ Միրզոյանը՝ արձագանքելով Ադրբեջանի մշակույթի նախարարի՝ Ադրբեջանի վերահսկողության ներքո հայտնված հայկական կրոնական և պատմամշակութային կոթողներն ավերելու և ինքնությունը փոխելու նպատակով աշխատանքային խմբի ստեղծման վերաբերյալ հայտարարությանը.

Արարատ Միրզոյանի արձանագրմամբ՝ Ադրբեջանի մշակույթի նախարարի հայտարարությունը նաև մարտահրավեր է ՄԱԿ արդարադատության միջազգային դատարանին.

«Այստեղ իրավացի են պնդումները այն մասին, որ սա տարիներ շարունակ տևած հայատյացության և էթնիկ զտումների քաղաքականության մի դրսևորում կարող է լինել։ Կարող եմ ասել, որ սա նաև մարտահրավեր է ՄԱԿ արդարադատության միջազգային դատարանի համար և հրատապ միջոցներ կիրառելու վերաբերյալ 2021 թվականի դեկտեմբերի 7-ի վերաբերյալ վճռի առումով, որտեղ շատ հստակ պարտադրվում է Ադրբեջանին կանխել և պատժել վանդալիզմի և պղծման դեպքերը՝ ուղղված հայկական մշակութային ժառանգության, կրոնական ժառանգության, այդ թվում՝ եկեղեցիների և այլ հուշարձանների, տեսարժան վայրերի դեմ։ Ադրբեջանը պետք է կատարի դատարանի վճռով իր վրա դրված պարտավորությունը»,- ասաց Արարատ Միրզոյանը։

ՀՀ ԱԳ նախարարն ընդգծեց, որ այս հարցում կարևոր է ՅՈՒՆԵՍԿՕ-ի միջամտությունը, և Հայաստանը ողջունել է ՅՈՒՆԵՍԿՕ-ի՝ տարածաշրջան գնահատող առաքելություն ուղարկելու մտադրությունը, որի մասին Հայաստանը և Ադրբեջանը փետրվարի 4-ին մտքեր են փոխանակել.

«Հստակ ժամկետներ չկան, բայց կողմերը վերահաստատել են կարևորությունը տարածաշրջան այդպիսի այց տարածաշրջան ունենալու։ Եվ հիմա այս հայտարարությունից հետո ևս դիմում ենք ՅՈՒՆԵՍԿՕ-ին և նաև նախատեսում ենք ոչ առցանց հանդիպումներ՝ քննարկելու այս հարցը։ Մեր պատկերացումներով, այդ այցը պետք է տեղի ունենա 1954 թվականի զինված ընդհարումների դեպքում մշակութային ժառանգության պահպանման վերաբերյալ կոնվենցիայի սահմանված սկզբունքներին համահունչ»,- ասաց Միրզոյանը:

Աղբյուր` Փաստինֆո