Փաստ ինֆո

Խորհրդարանը երկրորդ ընթերցմամբ ընդունեց «Քաղաքացիական պայմանագիր» խմբակցության պատգամավորներ Վլադիմիր Վարդանյանի և Վահագն Հովակիմյանի առաջարկած նախագիծը, որով առաջարկվում է փոփոխել դատավորին և Բարձրագույն դատական խորհրդի անդամին կարգապահական պատասխանատվության ենթարկելու, նրանց լիազորությունները դադարեցնելու, դատավորի և ԲԴԽ անդամի նկատմամբ քրեական գործ հարուցելու կամ նրան ազատությունից զրկելու վերաբերյալ համաձայնություն տալու համար անհրաժեշտ ձայների հարաբերակցությունը:

Այսպիսով՝ գործող օրենսդրությամբ դատավորի նկատմամբ իրավական գործընթաց սկսելու համար պահանջվում է, որ նախ դատական խորհուրդը այս հարցով առնվազն 2/3 մասնակցությամբ քվորում ապահովի, այսինքն՝ ԲԴԽ 10 անդամից 7-ը այսօրվա կարգավորուններով պետք է կողմ քվեարկեն, որպեսզի դատավորների նկատմամբ այսպիսի գործողություն իրականացվի: ՔՊ-ական պատգամավորների հեղինակած նախագծով առաջարկվում է փոփոխել այս հարաբերակցությունը և թույլատրել, որպեսզի քվորում լինի 6 անդամի առկայության դեպքում, իսկ 5-ի կողմ քվեարկության արդյունքում դատավորների նկատմամբ իրավական գործընթացներ կիրականացվեն:

«Հայաստան» խմբակցության պատգամավոր Աղվան Վարդանյանը նկատեց, որ դատական համակարգի այսօրվա ճնշումների պարագայում նախագիծը դառնալու է գործիք՝ դատարանների անկախությունը ճնշելու և լիազորություններից զրկելու, կալանավորելու, քրեական գործեր հարուցելու համար.

«Մենք ունենք ՍԴ-ում գործող կանոնակարգ, որը պահանջում է նման պարագայում ԲԴԽ անդամների ընդհանուր թվի առնվազն 2/3-ը, նվազեցնելով այս թիվը, նման լուծումներ թույլ տալով՝ մենք կարող ենք ունենալ իրավիճակ, որ 5 դատավորները միասին որոշում կայացնեն, իսկ 5 իրավաբաններ առանձին որոշում կայացնեն, ակնհայտ է, որ սա ևս մեկ քաղաքական գործիք է դառնալու իշխանության ձեռքին՝ դատական համակարգի անկախությունը ճնշելու համար»,-ասաց Աղվան Վարդանյանը:

Նախագծի համահեղինակ Վլադիմիր Վարդանյանն էլ նկատեց, որ կարող է լինել իրավիճակ, որբ ԲԴԽ անդամների թիվը հասնի 6-ի և բավականին երկար ժամանակ անդամներ չընտրվեն։ Ըստ պատգամավորի, սա նշանակում է, որ ցանկացած դատավոր կարող է անել ինչ ցանկակա՝ հասկանալով, որ հնարավորություն չի լինելու ԲԴԽ նիստ գումարել և որոշում կայացնել.

«Ի՞նչ է նշանակում այս կամ այն դատավորին կենթարկեն պատասխանատվության, ո՛չ, քրեական հետապդնում սկսելու համար անհրաժեշտ է, որ լինի քրգործ, գլխավոր դատախազը ներկայացնի հիմնավորումներ: Մի ստեղծեք տպավորություն, որ դա ճնշում է դատական իշխանության նկատմամբ»,-ասաց Վ.Վարդանյանը:

Արդարադատության նախարարի տեղակալ Գրիգոր Մինասյանն էլ նշեց, որ թեև ընդդիմությունը փորձում է ներկայացնել, որ նախագիծը ճնշում է դատական համակարգի վրա, սակայն վստահեցրեց, որ սա բարեփոխում է դատական համակարգում:

«Հայաստան» խմբակցության քարտուղար Արծվիկ Մինասյանն էլ նկատեց, որ այն դատավորները, որոնք իշխանության սրտի ուզած որոշումն են կայացրել, նրանց նկատմամբ չի իրականացվում իրավական գործողությունը, որն իրականացվում է ընդդիմության նկատմամբ արդարադություն իրականացրած ու նրանց կալանքները վերացրած դատավորների նկատմամբ.

«Բարձրագույն դատական խորհուրդը ունի 10 անդամ, ԲԴԽ նախագահ Ռուբեն Վարդազարյանի լիազորությոունների ապօրինի կասեցման արդյունքում այսօր մնացել է 9 անդամ, ձեր այս փոփոխություններով 5 հոգով կարող են որոշում կայացնել ցանկացած դատավորի ուղարկել քրեական հետապնդման դաշտ: Քաղաքական մեծամասնություն, դուք համաձա՞յն եք, որ այսօր քաղաքական իշխանության ու գործադիր իշխանության ճնշումներն է գնում դեպի դատական համակարգ»,- նշեց Մինասյանը:

Այսպիսով, Վլադիմիր Վարդանյանի և Վահագն Հովակիմյանի հեղինակած «Դատական օրենսգիրք» սահմանադրական օրենքում փոփոխություններ կատարելու մասին օրենքի նախագծին կողմ քվեարկեց 66 պատգամավոր, դեմ՝ 30 պատգամավոր:

Աղբյուր` Փաստինֆո