Փաստ ինֆո

Հայաստանի շուրջ օղակը գնալով սեղմվում է, մենք հայտնվել ենք ամենալուրջ մարտահրավերներով լեցուն մի միջավայրում:

ԱԺ նիստում հայտնեց «Հայաստան» խմբակցության պատգամավոր Արմեն Ռուստամյանը:

Պատգամավորի արձանագրմամբ՝ թուրք-ադրբեջանական տանդեմը անթաքույց հայտարարում է՝ ինչի՞ է ձգտում, ո՞րն է իր կենսական շահը, և դրանք ուղղակի հակասում են Հայաստանի շահերին:

«Մեզ ակնհայտ մարտահրավեր է նետված, այդ մարտահրավերը մենք կամ անտեսում ենք, կամ էլ ոչ ադեկվատ օրակարգերով զբաղվում: Այն օրակարգը, որ մենք հիմա քննարկում ենք, բացարձակ կապ չունի Հայաստանին սպառնացող մարտահրավերների հետ»,-ասաց նա:

Ըստ Ռուստամյանի՝ Թուրքիան և Ադրբեջանն ուղղակի արձանագրել են, որ առաջնորդվելու են 4 խնդրի լուծմամբ՝ պարտադրելու են Հայաստանին ճանաչել բոլոր ապօրինի սահմանները, հրաժարվել ցեղասպանությունից, բավարարել Ադրբեջանի պահանջները Արցախի հարցով և «Զանգեզուրի միջանցքի» հարցով.

«Այս ամենը սևով-սպիտակի վրա գրված է այն հռչակագրում, որը վավերացրել են Թուրքիան և Ադրբեջանը: Մենք դրան չունենք ադեկվատ արձագանք, իսկ այն, ինչ արձագանքվում է, ուղղակի սպասարկում է այն, ինչը որ այսօր հայտարարում է Թուրքիան՝ ցեղասպանությունը թողնում ենք Սփյուռքին, ասում ենք, որ մենք որևէ պահանջ չունենք սահմանների ճշգրտումների հետ կապված, ասում ենք, որ Ադրբեջանի կազմում պետք է մնա Արցախը, որովհետև տեսականորեն անգամ լուծում գոյություն չունի, անհասկանալի ձևակերպումներով խուսափում ենք Զանգեզուրի խնդրից և, ուրեմն, մեզ մնում է մեկ շանս, կա՛մ այս հարցը լուծում ենք այստեղ՝ խորհրդարանում՝ ուղղակի արձանագրելով մեր կարմիր գծերը, հայեցակարգը, կա՛մ այն կատարվելու է խորհրդարանից դուրս»,-ասաց Արմեն Ռուստամյանը:

Աղբյուր` Փաստինֆո