Փաստ ինֆո

Երևանի ավագանին փոխքաղաքապետեր է ընտրում։ Փաստորեն, նոր թիմ է ձևավորվում և քաղաքային իշխանությունն այսպիսով պատրաստվում է նոր ընտրությունների։ Նախապատրաստական մեկնարկը մեկուկես տարի առաջ սկսելը նշանակում է, որ իշխանությունները գիտակցում են՝ երևանյան ընտրողի հետ հեշտ չի լինելու։

Փոխքաղաքապետերը ջահել են, ձայն բերող չեն կարող լինել, նրանց վրա դժվար է «ստավկա անել»՝ տրամաբանությունը հանգստացնող չպետք է լինի։ Նաև՝ նոր՝ այսպես կոչված՝ «ավինյանական» թիմի ձևավորումը չի կարելի վաղաժամ համարել, քանի որ երեք երիտասարդներն էլ կոնկրետ ոլորտներից են եկել, ընդ որում, աշխատել են տվյալ ոլորտների՝ նախ՝ մասնավոր, հետո՝ պետական կառույցներում, պետոլորտի՝ հանրապետական նշանակության կառույցները գիտեն, հիմա՝ քաղաքային նշանակության միավորների հետ են գործ ունենալու։

Եվ բնավ պատահական չէ, որ ասենք, մասնագիտությամբ իրավաբան և իրավական ոլորտը համակարգող փոխքաղաքապետը առևտրի, սպասարկումների և գովազդների համակարգումն է իրականացվելու, ուր հանրային շփումները շատ մեծ են։

Առողջապահության նախարարությունում կորոնավիրուսի հիվանդանոցային բուժումը համակարգող, միաժամանակ, բուժհիմնարկների վերանորոգման և վերազինման գործն իրականացնող փոխնախարարից փոխքաղաքապետի պաշտոն զբաղեցնողը ևս լուրջ ռեսուրսի հետ է գործ ունեցել։ Եվ եթե այս համատեքստում դիտարկում ենք բուժհաստատություններում հին կադրերից ազատումները՝ հավանաբար հիշում եք՝ երևանյան բուժհիմնարկներից մեկում՝ «դու մուշտակ ես հագնում, հարուստ ես, հերիք է աշխատես, դու ամուսին ունես, գնա տանը նստի» և այլն, ստացվում է, որ քովիդի բուժման կենտրոններ եղած մայրաքաղաքային բուժհաստատություններում սերնդափոխություն է տեղի ունեցել և դժվար չէ կռահել, որ «վերապատրաստվածները» նաև «ընտրական» թեմաներով են եղել։ Նույն կերպ նաև՝ սոցիալական ծառայությունները։ Դեռ 2020 թվականին, կառավարության նիստերից մեկի ժամանակ Ջանջուղազյանի մի թեթև «ընդդիմությանը» հանդիպած սոցապնախարար Բաթոյանի ներկայացրած նախագիծը, ըստ որի սոցիալական ծառայությունները վերածվեցին նախարարության՝ նախարարության կազմում՝ հեռահար նպատակ ունեին։

Այս ծառայությունների ստեղծմանն ընդառաջ արդեն իսկ Երևանի քաղաքապետարանում կառուցվածքային փոփոխություն էր կատարվել՝ սոցիալական ծառայությունների բլոկը միացվել էր երեխաների պաշտպանությանը։ Հիմա, այս բլոկն ամբողջությամբ Բաթոյանի երբեմնի խորհրդականի համակարգման ներքո է։

Իսկ ընդհանուր առմամբ՝ հիշյալ փոխքաղաքապետերի ընտրությամբ մտածված սցենար է իրականացված և հատկապես՝ ընտրական գործընթացներին ընդառաջ։ Երրորդ փոխքաղաքապետն էլ ՏԿՆ համակարգմամբ գործող ճանապարհաշինական ՊՈԱԿ փորձառությամբ է / նշենք, որ ներկա իշխանությունը ի սկզբանե ճանապարհաշինությունը ասֆալտ փռելու, եղած ճանապարհները թարմացնելու հետ է շփոթում/՝ և համակարգելու է քաղաքապետարանի ճարտարապետական բլոկը, ինքնակամ կառույցները։

Այս ամենին էլ եթե գումարենք, որ էլեկտրոնային փաստաթղթաշրջանառության մեջ է լինելու փոփոխություն, այսինքն Երևանի քաղաքապետարանը անցնելու է կառավարության «Մալբրի» համակարգին, ուր ամեն բան հստակ երևում է, պարզ կդառնա, որ քաղաքային իշխանության վարչական ռեսուրսը ընտրություններից մեկուկես տարի առաջ բերվում է շարային դիրքի։

Աղբյուր` Փաստինֆո