Փաստ ինֆո

Այս պահին բողոքի ակցիա է է Գեղարքունիքում. քաղաքացիները փակել են Մարտունի–Վարդենիս ճանապարհը՝ պահանջելով Վարդենիս խոշորացված համայնքի ղեկավար ընտրված Ահարոն Խաչատրյանին հանձնել համայնքապետի աշխատասենյակի բանալին եւ կնիքը:

Հիշեցնենք, որ դեկտեմբերի 5-ին տեղի ունեցած ՏԻՄ ընտրությունների արդյունքներով՝ Վարդենիս խոշորացված համայնքում «Քաղաքացիական պայմանագիր» կուսակցությունը ստացել էր 12 մանդատ, «Ահարոն Խաչատրյան» կուսակցությունների դաշինքը 10 մանդատ, իսկ «Միասնական Վարդենիս» կուսակցությունների դաշինքը՝ 5: Ելնելով ընտրության արդյունքներից՝ «Ահարոն Խաչատրյան» կուսակցությունների դաշինքը և «Միասնական Վարդենիս» կուսակցությունների դաշինքը համագործակցության և համայնքում տեղական իշխանության մարմինները միասնաբար ձևավորելու մասին հայտարարություն էին ստորագրել: Դեկտեմբերի 30-ին ավագանու նիստում համայնքի ղեկավար էր ընտրվել Ահարոն Խաչատրյանը, որին այդպես էլ նախկին համայնքապետը՝ իշխանության ներկայացուցիչը, չհանձնեց կնիքն ու բանալիները։
ՔՊ-ն վիճարկել էր ավագանու նիստում համայնքի ղեկավար ընտրելու մասին որոշումը, միաժամանակ պահանջելով նաեւ անվավեր ճանաչել ընտրությունների արդյունքները։

Վարչական դատարանի փետրվարի 2-ին մասնակի բավարարել էր Նիկոլ Փաշինյանի կուսակցության՝ ՔՊ-ի ներկայացրած հայցը՝ անվավեր համարելով վճիռը` Վարդենիս համայնքի ղեկավար Ահարոն Խաչատրյանին ընտրելու վերաբերյալ ավագանու որոշումը, իսկ ընտրությունների արդյունքները վիճարկելու մասով հայցադիմումը՝ մերժել։

Վարդենիսում այսօր կրկին ավագանու նիստ էր հրավիրվել, որին ՔՊ-ն չէր մասնակցել, ընդդիմությունը, որը ունի բավարար քվե Վարդենիսում համայնքային իշխանություն ձեւավորելու համար, այսօր հայտարարել է, որ դատարանի այդ որոշումը չեն վիճարկելու՝ հաշվի առնելով համայնքում ստեղծված վիճակը, կուտակված հարցերը, որոնք անհապաղ լուծում են պահանջում ու ոչ էլ մանդատները վայր կդնեն։

«Միասնական Վարդենիս» խմբակցության ղեկավար Դավիթ Շահնազարյանը տեղեկացրել է, որ, եթե դատարանի որոշմամբ չի ճանաչվում համայնքապետ ընտրելու ավագանու որոշումը, ապա կհրավիրեն ավագանու նոր նիստ, և նորից Ահարոն Խաչատրյանը միանշանակ ընտրվելու է համայնքի ղեկավար. «Մեր քայլն ուղղված է նրան, որ օր առաջ կարողանանք հանգուցալուծել այս վիճակը եւ անցնել համայնքի ղեկավարմանը»,- ասել է նա:

Բնակիչները այս պահին ճանապարհ փակելով պահանջում են, որ վերականգնվի Վարդենիսում համայնքային կառավարումը ու Ահարոն Խաչատրյանին հնարավորություն տրվի՝ ստանձնել ղեկավարի լիազորությունները, ինչպես ուզում է ժողովուրդը։

Աղբյուր` Փաստինֆո