Փաստ ինֆո

«Ինձ մոտ տպավորություն է, որ այս իշխաությունը բոլորին ձեռնտու է բացի հայերից, ուրիշ բացատրություն չկա»,- լրագրողների հետ զրույցում ասաց Իշխան Սաղաթելյանը՝ պատասխանելով թե ինչու են միջազգային կառույցներն աչք փակում այս իրավական խախտումների վրա: 

Սաղաթելյանը նշեց, որ այս մարդիկ, երբ ժամանակին խոսում էին ժողովրդավարությունից ու անկախ դատական համակարգից, ակնհայտ է դառնում, որ նրանք կապ չունեն այդ ամեն ինչի հետ.

«Այսօր մի բան է հետաքրքրում իրենց՝ իշխանությունը, և ամեն գնով իրենց իշխանությունը պահելու համար պատրաստ են ցանկացած քայլի»:

Սաղաթելյանը նկատեց, որ դատական համակարգում մնացել են մի քանի դատավորներ, նրանց էլ կկալանավորեն, կխեղճացնեն, կհեռացնեն դատական համակարգից, որպեսզի իրենց հլու հնազանդ կատարողներին դնեն և հաստատեն իրենց բռնապետությունը:

«Այսօրվա իրավիճակն այսպիսին է»,-ասաց Իշխան Սաղաթելյանը և հավելեց.«Իրենք ի վիճակի չեն թշնամուն արձագանքելու և առհասարակ չեն արձագանքում դրսի այն բոլոր հայտարարություններին, որ տեղի է ունենում մեր երկրի նկատմամբ»:

Հայաստանի ինքնիշխանությունը և անկախությունը բացարձակ արժեք է և որևէ մեկն իրավունք չունի դա դնի հարցականի տակ,- շեշտեց Սաղաթելյանն՝ անդրադառնալով լրագրողի այն հարցին, թե արդյո՞ք սա խոսում է Հայաստանի վարած ոչ ճիշտ արտաքին քաղաքականության մասին։ Նա պատասխանեց, որ իհարկե սա խոսում է Հայաստանի արտաքին քաղաքականություն չունենալու մասին.

«Երբ ասում ենք ծնկի եկածները պետք է հեռանան, որ վերականգնենք մեր արժանապավությունը հենց սա նկատի ունենք: Պարտության խորհրդանիշ ուժը չի կարող սպասարկել Հայաստանի և հայ ժողովրդի շահերը և պատշաճ ներկայացնել աշխարհում միջազգային կազմակերպություններին: Երբ վռնդենք այս իշխանություններին, աշխարհը մեզ հետ այլ լեզվով է խոսելու»:

Իշխան Սաղաթելյանը նշեց, որ այս իշխանությունը կորցրել է նաև իր ժողովրդականությունն ու լեգիտիմությունը և որպեսզի կարողա իր իշխանությունը պահել, նման մեթոդների միջոցով իրականացնում է ձերբակալություններ.

«Տեսե´ք, քանի քաղբանտարկյալ կա, նրանք չեն հասկանում, որ այս ճանապարհով չեն կարող իրենց իշխանությունը պահել: Հավանաբար իրենց ինչ-որ մենը համոզել է, որ իրենց իշխանությունը հավեժ է: Ինձ մոտ տպավորություն է, որ նրանք չեն հասկանում, որ ցանկացած իշխանություն ժամանակավոր է, որ յուրաքանչյուրն իր արածի համար, այդ թվում՝ իրենց հլու հնազանդ դատավորներն ու ուժային կառույցների ներկայացուցիչները իրենց բոլոր ապօրինությունների համար պետք է պատասխան տան»,- եզրափակեց Սաղաթելյանը:

Աղբյուր` Փաստինֆո