Փաստ ինֆո

Եվրասիական տարածությունում ստեղծված ռազմաքաղաքական իրադրությունը հուշում է, որ առաջիկա տարիներին տեղափոխվելու ենք տարածաշրջանում և առհասարակ աշխարհում նոր վերախմբավորումների, արտաքին քաղաքական խմբագրումների, դաշինքների իմաստավորման, ինտեգրացիոն նոր նախագծերի ու բաժարար գծերի խորացման նոր ժամանակահատված: Այս մասին խորհրդարանում ելույթի ժամանակ հայտարարեց «Պատիվ ունեմ» խմբակցության պատգամավոր Տիգրան Աբրահամյանը և ընդգծեց, որ այս իրավիճակում Հայաստանը ստեղծված իրադրությունը և առաջիկա գործընթացները խորն ուսումնասիրելու, իրադարությունը ճշգրիտ գնահատելու կարևոր խնդիր ունի.
«Սա ենթադրում է ձևավորվող նոր ռազմաքաղաքական միջավայրում Հայաստանի տեղի և դերի ամրագրման, բարենպաստ միջավայրի ապահովման, միջազգային խաղացողների համար որպես ընկալելի գործընկերոջ դիրքավորմանը և պետական կառավարման համակարգերը տարբեր սցենարային զարգացումների նախապատրաստման անհրաժեշտություն»,- ասաց Աբրահամյանը:

Ըստ նրա՝ Հայաստանի իշխանությունների ներկայիս կեցվածքը, անտարբերությունը և բացառապես իշխանության պահպանության դիրքերից հանդես գալու քաղաքականությունը ոչ միայն խորացնում է Ադրբեջանից և Թուրքիայից եկող սպառնալիքները, այլ բերում է նոր ռիսկեր.

«Իշխանությունն իր տիրապետած ռեսուրսները վատնում է ներքաղաքական գործընթացներում, ընդդիմադիր գործիչների, տարբեր հասարակական դեմքերի, իր նկատմամբ նույնիսկ չեզոք դիրքորոշում ունեցող անձանց խմբերին լռեցնելու, ճնշելու և որպես վերջնարդյունք այլակարծությունը սպանելու, հասարակական համերաշխությունը խաթարելու, երկրում խորը պառակտումներ մտցնելու և ներքին անկայունություն հրահրելու համար»,-ասաց Աբրահամյանը:

Ընդդիմադիր պատգամավորի խոսքով՝ մեր իշխանությունները սխալվում են՝ կարծելով, թե Ադրբեջանի և Թուրքիայի հետ բանակցությունների պատրաստակամությունը, ՀՀ արտաքին քաղաքական օրակարգի առաջնահերթություններից հետ կանգնելը, միակողմանի զիջումների գնալը բավարարելու է Ադրբեջանի և Թուրքիայի քաղաքական ախորժակը.

«Այս իշխանությունը երկիրը գլորում է իներցիայի, անորոշությունների, անկանխատեսելի գործընթացների դաշտ, որի պայմաններում հայկական շահի ապահովումն ու առհասարակ հայի ֆիզիկական գոյությունը լուրջ սպառնալիքների տակ է»,- ասաց Տիգրան Աբրահամյանը։

Աղբյուր` Փաստինֆո