Փաստ ինֆո

Բնական է, որ նման հայտարարություններ չպետք է լինեն։ Սա նոնսենս է միջազգային դիվանագիտական պրակտիկայում, սկանդալային դրվագներից մեկը, բայց պատճառները պետք է փնտրենք մեր մեջ։ Այս մասին այսօր խորհրդարանում լրագրողների հետ զրույցում ասել է «Հայաստան» խմբակցության պատգամավոր Արմեն Ռուստամյանը՝ անդրադառնալով Բելառուսի նախագահի՝ Հայաստանի վերաբերյալ հայտարարությունը:

Ըստ ընդդիմադիր պատգամավորի՝ Լուկաշենկոյի հայտարարությունները վկայում են Հայաստանում առկա լուրջ ներքին խնդիրների մասին.
«Մենք թույլ ենք տալիս այդպես խոսել մեզ հետ։ Եվ միայն Լուկաշենկոն չի դա անում։ Հարևան երկրի նախագահը նսեմացնում, վիրավորում է մեր երկիրը և ղեկավարին։ Երբ մենք ասում էինք, որ Հայաստանը կորցրել է սուբյեկտությունը, հեղինակություն չունի, որպեսզի պաշտպանի իրեն և ստիպի հաշվի նստել իր հետ, հիմա տեսնում ենք, որ դա իրականություն է։ Սրանք հետևանքներն են։ Լուկաշենկոն այն օդիոզ անձնավորություններից մեկն է, որոնք ասում են, ինչ մտածում են՝ հաշվի չառնելով՝ կարելի է նման բառապաշար օգտագործել, թե ոչ։ Բայց դա վկայում է լուրջ ներքին խնդիրների և այն մասին, թե ինչ է տեղի ունենում կուլիսների հետևում»,- նշել է Ռուստամյանը։

Աղբյուր` Փաստինֆո