Փաստ ինֆո

Վերաքննիչ քրեական դատարանը՝ դատավոր Ռուբիկ Մխիթարյանի նախագահությամբ, հեռացել է խորհրդակցական սենյակ՝ Գորիսի համայնքապետ Առուշ Առուշանյանի նկատմամբ գրավ կիրառելու միջնորդությունը մերժելու որոշման դեմ բողոքի վերաբերյալ որոշում կայացնելու։ 

Ինչպես արդեն տեղեկացրել ենք՝ 2021թ դեկտեմբերի 28-ին Սյունիքի մարզի ընդհանուր իրավասության դատարանը՝ դատավոր Գնել Գասպարյանի նախագահությամբ, մերժել է Առուշ Առուշանյանին 30 մլն ՀՀ դրամի չափով գրավի դիմաց ազատ արձակելու մասին պաշտպանների միջնորդությունը: Եւ սա այն դեպքում, երբ նախաքննության ընթացքում Առուշանյանի դեմ ցուցմունք տված Լուսինե Ավետյանը դատարանում արդեն ցուցմունք է տվել՝ հրաժարվելով նախաքննական իր ցուցմունքից: Ավելին` նա հայտարարել է, որ զղջում է Առուշանյանի վերաբերյալ սխալ ցուցմունք տալու համար: Առաջին ատյանի դատարանը գտել էր, որ գործով դատակոչված ևս 6 վկաներ կան, որոնք պետք է հարցաքննվեն։

«Փաստինֆո»-ի թղթակցի հաղորդմամբ՝ դատական նիստին պաշտպանության կողմը ներկայացրեց բողոքը, որով պահանջում են Առուշանյանի նկատմամբ ընտրված խափանման միջոց կալանավորումը փոխարինել գրավով՝ գրավի չափ առաջարկելով առնվազն 80 մլն ՀՀ դրամը։ Պաշտպանության կողմի գնահատմամբ՝ առկա են բոլոր նախադրյալները՝ Առուշ Առուշանյանի խափանման միջոցի փոփոխման համար, բացի այդ՝ դատավարության սույն փուլում, ըստ պաշտպանների, գործի քննությանը խոչընդոտելու հավանականությունն արդիական չէ։ Ինչ վերաբերում է գործով դատակոչված վեց վկաներին, որոնք դեռևս չեն հարցաքննվել, պաշտպանության կողմը հիշեցրեց, որ նշված անձինք Առուշանյանի դեմ մեղադրական բնույթի ցուցմունք չեն տվել, հետևաբար, տրամաբանական չէ նրանց վրա ազդեցություն ունենալը։ Փաստաբան Էրիկ Ալեքսանյանի դիտարկմամբ՝ քննության սկզբնական փուլից գործի ողջ էությունը կազմված է եղել Լուսինե Ավետյանի ցուցմունքի հիման վրա, բացառապես նրա ցուցմունքի հիման վրա է, ինչ Առուշանյանն արդեն յոթ ամիս գտնվում է կալանքի տակ, նրա ցուցմունքները չեն հաստատվում, իսկ հետագայում Ավետյանն ինքը դատարանում ցուցմունք է տվել՝ հերքելով նախաքննության ընթացքում տված ցուցմունքները, ինչն էականորեն նվազեցնում է ազդեցություն գործադրելու ռիսկը։ Փաստաբանը նաև հիշեցրեց հենց դատավոր Ռուբիկ Մխիթարյանի կողմից նախկինում կայացված դատական ակտերից մեկը, որով դատավորն անփոփոխ է թողել գործերից մեկով գրավի որոշումը, թեև գործով դատակոչված էր 150 վկա, որոնք հարցքննված չէին։ Փաստաբանը ուշադրություն հրավիրեց նաև Առուշանյանի անձնական հատկանիշներին, որոնցով նա երաշխիքներ է տալիս, որ գտնվելով ազատության մեջ կդրսևորի պատշաճ վարքագիծ։

Փաստաբան Արմեն Մելքոնյանն էլ ուշադրություն հրավիրեց այն հանգամանքին, որ դատարանի բակում հավաքված էին քաղաքացիներ և նրանց պետք է հույս ներշնչել, վաղուց դատարանի շենքի պատերը չեն լսել դատավճիռ, որը կարող էր հույս ներշնչել։ Մելքոնյանի խոսքով՝ Առուշանյանը հերոսություն է կատարել, բանտում նստած՝ պայմաններում հաղթել է ընտրությունները, այն էլ՝ Գորիսում։

«Ի՞նչ ենք անում էլի ,ԱԱԾ-ում մեկուսացնելով Առուշին ինչ խնդիր ենք լուծում»,- նշեց նա՝ հավելելով, թե ով է իրավունք տվել՝ այդքան ընտրողի քվեն բռնաբարել։

Հատկանշական է, որ քրեական գործը բաղկացած է 22 հատորից, որոնցից հետազոտվել է միայն 7-ը և այս հետազոտման հաջորդականության պայմաններում, առաջնորդվելով տրամաբանությամբ, թե պետք է բոլոր վկաները հարցաքննվեն, Առուշանյանը կարող է կալանավորված մնալ ավելի քան մեկ տարի։ Պաշտպանները պնդում են՝ ազատության իրավունքի նկատմամբ պետությունը պետք է բացառիկ հարգանք ցուցաբերի։ Ինչ վերաբերում է այն հանգամանքին, որ Առուշանյանին մեղսագրվող արարքը ծանր է, Արմեն Մելքոնյանը տեղեկացրեց, որ Առուշանյանի նկատմամբ հարուցվել է մոտ 20 քրեական գործ, որոնցից 17-ը կարճվել է՝ հանցակազմի բացակայության հիմքով, ընդ որում, դրանց մի մասը եղել են ծանր հանցագործության գործեր։

Մեղադրող դատախազներ Արմեն Մուրադյանը և Գուրգեն Մադոյանն առարկեցին բողոքի դեմ՝ պնդելով, որ առաջին ատյանի դատարանի որոշումն օրինական է, իսկ բողոքը՝ մերժման ենթակա։

Կողմերի դիրքորոշումը լսելուց հետո Վերաքննիչ քրեական դատարանը՝ դատավոր Ռուբիկ Մխիթարյանի նախագահությամբ, հեռացել է խորհրդակցական սենյակ՝ որոշում կայացնելու։ Դատարանի որոշումը կհրապարակվի վաղը՝ ժամը 09,40-ին։

Հիշեցնենք, որ Գորիս համայնքի Քարահունջ բնակավայրի վարչական ղեկավար Լուսինե Ավետյանը ձերբակալվել է հուլիսի 5-ին՝ ժամը 16։24-ի սահմաններում՝ ՀՀ քրեական օրենսգրքի 149-րդ հոդվածի 2-րդ մասի 2-րդ և 4-րդ կետերով, 149.1-րդ հոդվածի 2-րդ մասի 2-րդ կետով, 154.2-րդ հոդվածի 2-րդ մասով և 154.2-րդ հոդվածի 3-րդ մասով նախատեսված արարք կատարելու հատկանիշներով։

Ձերբակալման որոշման դեմ բողոք է ներկայացվել, սակայն մինչ դատարանը կքններ Ավետյանի ձերբակալման իրավաչափության հարցը, վարույթն իրականացնող մարմինը շտապեց մեղադրանք առաջադրել Ավետյանին և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացնել դատարան, որը բավարարվել էր։ Նա կալանքից ազատվել էր Առուշանյանի դեմ ցուցմունք տալուց հետո:

Նախաքննական մարմինը Գորիսի համայնքապետարանի կողմից սոցիալապես անապահով բնակիչներին տրված սոցիալական օգնությունը գնահատել է որպես ընտրակաշառք ու կալանավորել Գորիսի քաղաքապետ Առուշ Առուշանյանին, որն իր անհամաձայնությունն էր հայտնել Սյունիքի ռազմավարական նշանակության բարձունքները հակառակորդի հսկողության տակ հանձնելու Նիկոլ Փաշինյանի որոշման կապակցությամբ:

Հեղինակ՝ Իզաբել Սահակյան

Աղբյուր` Փաստինֆո