Փաստ ինֆո

Գարնան առաջին օրը՝ մարտի մեկին, մեծ էկրաններ կբարձրանա ռեժիսոր Ռոման Մուշեղյանի «Գարուն ա» ֆիլմը: Ֆիլմը դրամատիկ երանգներով համեմված ողբերգություն է, որտեղ ներկայացված են երեք սերունդների ՝ հոր, որդու, թոռան պատկերացումները հայրենիքի, պետականության մասին, և արդեն որպես վերջին ակորդ՝ Ապրիլյան պատերազմը:

«Գարուն ա» ֆիլմը հայրենասիրության, բանակի ու զինվորականի մասին է՝ մատուցված հայր և որդի փոխհարաբերությունների, նրանց աշխարհայացքների տարբերության մոտիվներով:

Ֆիլմի գլխավոր պրոդյուսերը և գլխավոր դերակատարը Ալեքսանդր Խաչատրյանն է, պրոդյուսերը՝ Դիանա Ավետիսյանը։ Սցենարի հեղինակն է Հարություն Ղուկասյանը, օպերատորը՝ Սուրեն Թադևոսյանը: Կինոնկարի գլխավոր հերոսները երեքն են՝ պապը, որին մարմնավորում է դերասան Ալեքսանդր Խաչատրյանը, որդին՝ որի կերպարը մարմնավորում է Արմեն Մարգարյանը և թոռը, ում կերպարն էլ մարմնավորում է երիտասարդ դերասան Լևոն Հախվերդյանը:

Ֆիլմի մյուս դերակատարներն են՝  Մարջան Ավետիսյանը, Եվա Զոհրաբյանը, Շանթ Հովհանիսյանը, Ալիս Կապլանջյանը, Վահագն Մարտիրոսյանը, Սաթենիկ Հազարյանը, Նարինե Պետրոսյանը և այլոք։

Նկարահանումները սկսվել են 2020թ-ի ամռանը, սակայն կորոնավիրուսի և 44-օրյա պատերազմի պատճառով դրանք տևական ժամանակ հետաձգվել են, վերսկսել են արդեն հաջորդ տարի՝ 2021թ-ին:

Ֆիլմը բաղկացած է երկու մասից՝ մի մասում քաղաքացիական տեսարաններ են, իսկ ֆիլմի արդեն պատերազմական տեսարանները նկարահանվել են Դիլիջանում՝ լեռնային հատվածներում:

Այսօր ԶԼՄ-ների հետ հանդիպման ժամանակ ֆիլմի գլխավոր պրոդյուսեր, գլխավոր դերակատար Ալեքսանդր Խաչատրյանը պատմեց, որ ի սկզբանե գաղափար է եղել ստեղծել ֆիլմ՝ Արցախյան առաջին պատերազմի մասին, սակայն արդեն հաջորդ տարի՝ 2016թ-ին սկսվեց ապրիլյան քառօրյա պատերազմը.

«Մեզ համար անակնկալ էր պատերազմի ժամանակ մեր ժողովրդի՝ մեկ մարդու նման իրար կողքի կանգնելը։ Սփյուռքում և Հայաստանում, երիտասարդները հերթ էին կանգնել՝ առաջնագիծ մեկնելու համար: Մենք մտածենցինք, որ պետք է ոչ թե պատերազմի և հաղթանակի մասին, այլ հենց այս երևույթի մասին խոսել»։

Ռեժիսոր Ռոման Մուշեղյանն էլ ընդգծեց, որ ֆիլմի հիմնական կոնֆլիկտը սերունդների գաղափարական բախումն է.
«Ֆիլմի գլխավոր կերպարն Արամ Ամատունին է, զորացրված սպա, որի հայրենասիրությունը սահմաններ չունի, հայրենիքի շահը վեր է դասում ամեն ինչից, անգամ սեփական ընտանիքից, նրա համար հայրենիքը զուտ հողակտոր չէ, հայրենիքը սկսվում է յուրաքանչյուր անհատի պատասխանատվությունից և մեծ սիրուց առ հայրենիք, ընտանիք։ Հերոսը համոզված է, որ հենց այս գաղափարը կարող է հիմք ծառայել առողջ հասարակություն և հզոր պետականություն ունենալու համար»,-ասաց ռեժիսորը:

Ռոման Մուշեղյանի ֆիլմում շեշտադրված է հայ ժողովրդի հայրենասիրական դրսևորումները և պատկերացումները, որին զուգահեռ անդրադարձ է կատարվում նաև Ապրիլյան քառօրյա պատերազմին:

Ֆիլմը Aratta Production-ի, Vision Studio-ի, Phoenix Art Foundation-ի համատեղ արտադրությունն է։ Այն նկարահանվել է ՀՀ պաշտպանության նախարարության և ArLeAM-ի աջակցությամբ։

Աղբյուր` Փաստինֆո