Փաստ ինֆո

Որոշումը այն էր ինչ-որ սպասում էինք բոլորս։ Դատավոր Դավիթ Արղամանյանը պիոների պես կատարեց իր հանձնարարությունը և կալանավորեց Սյունիքի մարզի ընդհանուր իրավասության դատարանի դատավոր Բորիս Բախշիյանին։ Այս մասին լրագողների հետ զրույցում ասաց փաստաբան Երեմ Սարգսյանը՝  Երևանի ընդհանուր իրավասության դատարանի որոշումից հետո։ 

Հիշեցնենք, որ Երևանի ընդհանուր իրավասության դատարանը՝ դատավոր Դավիթ Արղամանյանի նախագահությամբ, բավարարեց Բորիս Բախշիյանի նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդությունը։

«Որոշմանը ծանոթացանք, և անընդհատ ուզում ենք հասկանալ,  թե՝ ի՞նչի համար, ինչ է գրվել, իհարկե իմաստ չկա ոչինչ փնտրելու։ Արդարադատությունը բռնաբարեցին, ժողովրդավարությունը գլորվեց անդունդը»,-նշեց փաստաբան Երեմ Սարգսյանը՝ նշելով. որ կան դատավորներ, որոնք ամեն ինչ անում են, որ դառնան իշխանավորների սիրելին։ 

«Կա դատավոր Բախշիյան և կա դատավոր Արղամանյան, կան դատավորներ և կան նրանք, ովքեր ամեն ինչ անում են, որպեսզի իրենք լինեն իշխանությունների սիրելին, որպեսզի ամեն ապօրինության համար երաշխավորված լինեն և կատարեն ապօրինություններ: Կա Բախշիյան և նրա նմանները, որոնք համարձակորեն փորձում են ընդդիմանալ, ինչը անթույլատրելի է մեր ժողովրդավարական երկրում, հետևաբար նրանց պետք է կալանավորել, աչքները վախեցնել»,-հայտարարեց փաստաբանը:

Աղբյուր` Փաստինֆո