Փաստ ինֆո

«Օմիկրոն» շտամը մեծ վարակելիություն ունի ոչ միայն ուսումնական հաստատություններում, այլ նաև բուժհաստատություններում՝ թե բուժանձնակազմի, թե հիվանդների շրջանում։ Այս մասին «Փաստինֆո»-ին ասել է բժիշկ, համաճակարաբան Նունե Քրիշչյանը։ Ավելին՝ «Օմիկրոն» շտամին զուգահեռ շրջանառվում է նաեւ A տիպի գրիպը։

Համաճարակաբանի խոսքով՝ այս 2 միքսված ինֆեկցիայի վարումը բավական դժվար է, շատ դեպքերում այդ հետազոտությունը կատարելն էլ բավական բարդ է, քանի որ բոլոր բուժհաստատությունները բավականին ծանրաբեռնված են եւ գրիպի նմուշ առանձնապես չեն էլ վերցնում, հիմնականում շեշտադրումը կորոնավիրուսի «Օմիկրոն» շտամի վրա է՝ ավելի ակտիվ շրջանառում ունենալու պատճառով:

««Օմիկրոն» շտամը մեծ վարակելիություն ունի ոչ միայն ուսումնական հաստատություններում, այլ նաև բուժհաստատություններում՝ թե´ անձնակազմի, թե´ պացիենտների շրջանում: Ինչքան էլ փորձում ենք պահպանել անվտանգության բոլոր կանոնները՝ ախտահանումը, ձեռքերի հիգիենան, հեռավորությունը և դիմակի կրումը, միևնույն է, վիրուսի տարածումը բավական շատանում է: Ճիշտ է, դիմակի կրումը և մյուս կանոնների պահումը նվազեցնում է վարակման ռիսկը, բայց անսպասելի բավական մեծ քանակով մարդիկ են վարակվում, հիվանդանոցներում՝ պացիենտների շրջանում, լինում է նույնիսկ անախտանշան: Երբ պացիենտը ջերմում է և կան այլ ախտանշաններ, միանգամից մեկուսացնում ենք, սակայն անախտանշան պացիենտները դառնում են վիրուսի տարածման պատճառ»,-նշել է համաճարակաբանը:

Այն հարցին, որ կան դպրոցներ, որոնք անցել են հեռավար ուսուցման, իսկ որոշներն էլ մասնակի, արդյո՞ք այս երեխաների կոլեկտիվ ներկայությունն ավելի չի սրում իրավիճակը, քանի որ երեխաները միշտ չէ, որ կարող են կանոնները պահել՝ Նունե Քրիշչյանը պատասխանեց. «Եթե նույնիսկ լոքդաուն հայտարարվի, այդ նույն երեխան, որը չի գնա ուսումնական հաստատություն, իջնելու է բակ կամ ծնողի հետ գնալու է մի փակ միջավայր: Ես կարծում եմ՝ լոքդաունի փուլն անցանք կորոնավիրուսի տարածման առաջին շրջանում: Այդ շտամի ժամանակ իր դրական արդյունքն ունեցավ, հիմա դուք տեսեք ինչ է կատարվում խանութներում, ժամանցի վայրերում, ռեստորաններում: Մարդիկ ծնունդներ են կազմակերպում, հարսանիքներ, և այլն, էլ ի՞նչ դպրոց փակելու մասին է խոսքը։ Իսկ հեռավար ուսուցման համար, կարծում եմ, որ այնքան մարդ հնարավորություն չունի, համակարգիչ էլ չունի տանը, երեխան զուրկ է մնում իր կրթական ծրագրից»:

Համաճակարաբանի խոսքով՝ «Օմիկրոն» շտամի դիմացն առնել հնարավոր չէ: «Մինչև կորոնավիրուսը «Հհիվանդությունների վերահսկման կանխարգելման ազգային կենտրոնը» հենց հիվանդացության սահմանը բարձրանում էր՝ դպրոցները 2 շաբաթով փակելու հրաման էր տալիս, այդ բաց թողած հատվածը դուրս էր գալիս արձակուրդներից, իսկ հիմա սա անել էլ հնարավոր չէ, քանի որ այս «Օմիկրոն» շտամը A տեսակի գրիպից, B տեսակի գրիպից ավելի վարակիչ է: Ասեմ, որ մեծ մասն սովորական սեզոնային գրիպի պես թեթև են անցկացնում: Երևի մեզ համար սրա միջով անցնելն էլ է պետք: Արդեն շատ երկրներ հանում են, մեղմացնում են բոլոր սահմանափակումները, նույնիսկ՝ կանաչ անձնագրերը: Կրկին լոքդաունի գնալն այս վիճակում անիմաստ է, չես կարող ժողովրդին զսպել»,- ասում է համաճարակաբանը:

Կա՞ այնպիսի հետազոտություն, թե վիրուսը քանի մուտացիոն շրջան կարող է ունենալ հարցին համաճարակաբանը պատասխանեց, որ ոչ ոք չի կարող ասել, որ համաշխարհային նման տվյալներ չկան: Շրջանառվող այս շտամն էլ կարող է կրկին մուտացվել և ավելի դաժան ընթացք ունենալ, կարող է և հակառակը լինի, ոչ ոք չի կարող ասել, ասում է համաճարակաբանը:

Աղբյուր` Փաստինֆո