Փաստ ինֆո

Սիսիանի նախկին քաղաքապետ Արթուր Սարգսյանի պաշտպանները պահանջում են Վերաքննիչ քրեական դատարանի դատավոր Արմեն Դանիելյանին քրեական պատասխանատվության ենթարկել՝ Սարգսյանին ապօրինի կալանավորելու համար։ Արթուր Սարգսյանի փաստաբանն օրերս հանցագործության մասին հաղորդում է ներկայացրել ԱԱԾ՝ պահանջելով քրեական գործ հարուցել ՀՀ քրեական օրենսգրքի 348-րդ հոդվածի հատկանիշներով՝ Արթուր Սարգսյանին ակնհայտ ապօրինի կալանավորելու համար։

Նկատենք՝ ՀՀ քրեական օրենսգրքի 348-րդ հոդվածը, որը քրեական պատասխանատվություն է նախատեսում ապօրինի ձերբակալելու, կալանավորելու համար նախկինում չի կիրառվել, համենայն դեպս դատական պրակտիկա որպես այդպիսիք չկա, թեեւ բազմաթիվ գործեր կան, երբ դատարանների արձանագրվել է մարդուն արգելանքի վերցնելու ապօրինությունը։

Սիսիանի նախկին համայնքապետ, այժմ՝ «Հայաստան» խմբակցության պատգամավոր Արթուր Սարգսյանի պաշտպան Էմին Խաչատրյանը «Փաստինֆո»-ի հետ զրույցում հայտնեց, որ օրերս ԱԱԾ հաղորդում է ներկայացվել՝ պահանջելով քրեական գործ հարուցել՝ Սարգսյանին ապօրինի կալանավորելու համար։

Հիշեցնենք, որ Արթուր Սարգսյանը կալանավորվել էր Վերաքննիչ քրեական դատարանի դատավոր Արմեն Դանիելյանի որոշմամբ, դատավորն անգամ չէր ծանուցել պաշտպանության կողմին և կալանավորման որոշում կայացրել՝ առանց մեղադրյալին և պաշտպաններին լսելու, իսկ այն բանից հետո, երբ ՍԴ-ն արձանագրել է, որ անազատության մեջ գտնվող պատգամավորի կարգավիճակ չունեցող անձը պատգամավորի կարգավիճակ ձեռք բերելու պահից, չի կարող պահվել անազատության մեջ, Սարգսյանն ազատ էր արձակվել։

Արթուր Սարգսյանի փաստաբանները դեռևս նոյեմբեր ամսին՝ դատավոր Դանիելյանի կայացրած որոշումից անմիջապես հետո հանցագործության մասին հաղորդում են ներկայացրել ՀՀ գլխավոր դատախազություն՝ պահանջելով քրեական գործ հարուցել ակնհայտ ապօրինի դատական ակտ կայացնելու համար, ինչպես նաև՝ դիմել են ՀՀ արդարադատության նախարարությանը և Դատավորների ընդհանուր ժողովի էթիկայի և կարգապահական հարցերի հանձնաժողովին՝ պահանջելով հարուցել կարգապահական վարույթ։

Կարգապահական վարույթ Դանիելյանի նկատմամբ այդպես էլ չի հարուցվել, թեև ժամկետներն արդեն սպառվել են՝ պաշտպանները դեռևս տեղեկություն չունեն, իսկ ինչ վերաբերում է ավելի վաղ ներկայացված հանցագործության մասին հաղորդմանը՝ փաստաբանը նշեց, որ դատախազությունը ներկայացված հաղորդումն ուղարկել էր Հակակոռուպցիոն կոմիտե, որտեղից պաշտպանության կողմը գրություն է ստացել, թե պաշտպանների կողմից բարձրացվող խախտումները սուբյեկտիվ ընկալում է։

«Տպավորություն է, որ երազ ենք տեսել, մեզ ծանուցել են, մենք էլ՝ չենք իմացել, բայց մենք խոսել ենք փաստերով, փաստեր ներկայացրել։ Ի վերջո, փաստը մնում է փաստ, որ մենք դատական նիստին առհասարակ ներկա չենք եղել»,- նշեց Էմին Խաչատրյանը՝ ընդգծելով, որ մեղադրյալի լսված լինելու իրավունքը չի ապահովվել։ Փաստաբանները կրկին գրությամբ դիմել էին դատախազություն՝ պահանջելով, որ իրենց գրությամբ պատասխանեն, սակայն պատկերը նույնն է եղել և այժմ պաշտպանները դատախազության անգործությունը վիճարկել են Երևանի ընդհանուր իրավասության դատարանի վարույթում, դատական նիստի օրը դեռևս նշանակված չէ։

Ընդ որում՝ Արթուր Սարգսյանի ապօրինի կալանավորման ապօրինության մասին պաշտպանները բազմիցս են բարձրաձայնել, ավելին, միջնորդություն էին ներկայացրել նաև գլխավոր դատախազին՝ «հիշեցնելով» անձեռնմխելիության հաղթահարման անհրաժեշտության մասին, ինչը, սակայն ևս դատախազության կողմից մերժվել է և այժմ այդ որոշումը վիճարկվում է դատարանում։

«Մեր պաշտպանյալի իրավունքի խախտումը, այնուամենայնիվ, պետք է արձանագրվի նաև դատական ակտով, պետք է հիմնավորվի, որ ի սկզբանե այն ժամանակահատվածը, երբ Սարգսյանը կալանավորված էր, իրավունքի խախտմամբ է եղել»,- ընդգծեց Խաչատրյանը։

«Փաստինֆո»-ն տեղեկացրել է, որ իշխանությունները հետապնդում են իրականացնում Սյունիքի մարզի ընդհանուր իրավասության դատարանի դատավոր Բորիս Բախշիյանի նկատմամբ՝ լեգենդար հրամանատար Աշոտ Մինասյանի խափանման միջոցը փոխելուց հետո: Դատավորին մեղադրում են Նիկոլ Փաշինյանի աջակցին կալանավորելու համար, թեեւ նա, լինելով ամբաստանյալ, ոչ պատշաճ վարքագիծ է դրսեւորել՝ չմասնակցելով նիստերին։ Ընդ որում՝ ամբաստանյալին կալանավորելու դատարանի որոշման հետ համակարծիք է եղել նաեւ դատախազը՝ չբողոքարկելով այն, ինչից ամիսներ անց դատավորի նկատմամբ քրեական գործ է հարուցվել, իսկ ԲԴԽ-ն էլ բավարարել է դատավորին անձեռնմխելիությունից զրկելու ու որպես խափանման միջոց կալանավորումն ընտրելու մասին միջնորդությունները։ Ավելին, այսօր՝ փետրվարի 7-ին դատավորը նաեւ կալանավորվեց։

Դատավոր Բախշիյանի նկատմամբ իրականացվող հետապնդումն առաջացրել է դժգոհության մեծ ալիք, այդ թվում փաստաբանական համայնքում՝ գնահատելով այն դատական իշխանության նկատմամբ անթաքույց ճնշման ցցուն դրսեւորում։

Արթուր Սարգսյանի փաստաբան «Փաստինֆո»-ին տեղեկացրեց, որ այն բանից հետո, երբ դատավոր Բախշիյանի նկատմամբ քրեական հետապնդում է իրականացվել անձին իբրև ապօրինի կալանավորելու հատկանիշներով, ԱԱԾ պետի հասցեագրված հաղորդում է ներկայացվել՝ Սարգսյանին ապօրինի կալանավորելու հատկանիշներով, դեռևս որևէ տեղեկություն չունեն՝ հաղորդման ընթացքի վերաբերյալ։

«Երբ լսեցինք, որ դատավոր Բախշիյանի նկատմամբ նման գործընթաց է սկսվել, արդարացիության սկզբունքը պահելու համար, որոշեցինք, որ պետք է հաղորդում ներկայացնել նաև այդ մասով։ Գործի մանրամասներին ծանոթ չեմ, բայց այս դեպքում դատավոր Բախշիյանը պատշաճ ծանուցել է անձին, որևէ տեղեկություն նրանից չի եղել և միայն դրանից հետո որոշում է կայացվել անձին կալանավորելու մասին»,- նշեց Խաչատրյանը՝ հավելելով, որ իրենց պարագայում ծանուցում չի եղել և մեկ ժամ հետո՝ կալանավորման որոշում է կայացվել.«Որն է կլասիկ ապօրինի դատական ակտ կայացնելը, որն է ակնհայտ ապօրինի կալանավորելը»։

Հեղինակ՝ Իզաբել Սահակյան

Աղբյուր` Փաստինֆո