Փաստ ինֆո

Ադրբեջանական զինված ուժերը կոպտորեն խախտում են սահմանային բնակիչների անձնական կյանքի գաղտնիությունը՝ տեսախցիկներով վերահսկելով նրանց։ Այս մասին հրավիրված ասուլիսին ասաց մարդու իրավունքների պաշտպան Արման Թաթոյանը։ 

«Ադրբեջանական իշխանությունների քաղաքականությունը՝ ատելության, թշնամանքի՝ ուղիղ վերաբերում է նաև նրան, թե ինչ խախտումներ են ադրբեջանցի զինված ծառայողները թույլ տալիս մեր սահմանային բնակիչների նկատմամբ։ Գրանցվել են սեփականության իրավունքի խախտումներ, կրակոցներ, մարդկանց առևանգելու դեպքեր։ Արցախում հատկապես շատ են սպանության դեպքերը, գյուղատնտեսությամբ զբաղվելուն խոչընդոտելը, անձնական կյանքի գաղտնիության կոպիտ խախտումները։ Այլընտրանքային ճանապարհների անվտանգությունը խաթարված է, մեր գյուղերը կանգնած են մեկուսացման, հումանիտար լուրջ խնդիրների առաջ»,-նշեց ՄԻՊ-ը՝ անդրադառնալով սահմաններից «հայելային» ետքաշմանը։

Թաթոյանի դիտարկմամբ՝ մինչև քաղաքական գործընթացների ավարտը, մարդու իրավունքների տեսանկյունից մարդկանց կյանքը նորմալ երաշխավորելու համար չպետք է առհասարակ այդ տարածքներում ադրբեջանական զինված ծառայողներ լինեն, որովհետև նրանք ոչ միայն մեր քաղաքացիներին օրինական իրավունքներով պատկանող հողերում են, այլև՝ մեր խաղաղ բնակիչների բնականոն, նորմալ կյանքն անհնարին են դարձնում։ Ընդ որում, խոսքը ոչ միայն մայիսյան ներխուժումների մասին է, այլև՝ մինչ այդ նրանց կողմից դրսևորած սանձարձակ վարքի։

«Երբ մենք անում ենք ամեն ինչ, որ լեգիտիմացնենք, օրինականացնենք ադրբեջանական զինծառայողների ներկայությունը և ցույց չենք տալիս այս խախտումներն ու ժամանակին չենք գործում, հետո ասում ենք՝ անիրատեսական է։ Անիրատեսականության հիմքերը հենց այդպես են ստեղծվում»,- նշեց Թաթոյանը։

Աղբյուր` Փաստինֆո