Փաստ ինֆո

Ընդդիմությունն ուներ մի քանի տարբերակ, ընտրեց ամենաարդյունավետ տարբերակը: «Փաստինֆո»-ի հետ զրույցում քաղտեխնոլոգ Արմեն Բադալյանն այսպես գնահատեց ընդդիմության՝ նախագահական ընտրություններին չմասնակցելու որոշումը.

«Եթե ՔՊ-ն նախագահի պաշտոնում առաջադրեր վարչապետի աշխատակազմի ղեկավար Արայիկ Հարությունյանի թեկնածությունը, հաշվի առնելով նրա շատ ցածր վարկանիշը և նրա նկատմամբ եղած բացասական դիրքորոշումը՝ այդ դեպքում տրամաբանական կլիներ, որ ընդդիմությունը թեկնածու առաջադրեր, բայց հաշվի առնելով , որ այլ թեկնածու է առաջադրվել , տվյալ կոնտեքստում, ընդդիմության քայլը տրամաբանական էր»,-ասաց նա:

Ըստ Բադալյանի՝ պետք չէր թեկնածու առաջադրել, միայն առաջադրելու համար, պետք է հաշվի առնել դրա արդյունավետությունը.

«Ընդդիմությունը կարող էր առաջադրել թեկնածու, բայց եթե դա չէր տալու մաքսիմալ արդյունք, ուրեմն անիմաստ էր թեկնածու առաջադրելը»,-ասաց նա:

Քաղտեխնոլոգի դիտարկմամբ՝ ընդդիմությունն ում թեկնածությունն էլ առաջադրեր, միևնույնն է, իշխանությունը չէր ընտրելու նրան.

«Քվեարակում է 71 հոգի, իսկ այդ 71 հոգու վրա մեկ մարդ ազդեցություն ունի՝ Նիկոլ Փաշինյանը: Դու կարող ես Պուտինի թեկնածությունն էլ դնել, միևնույնն է, նա չի անցնի, քանի որ ընտրում են 71 հոգին, որոնք քվեարկում են այնպես, ինչպես որոշում է մեկ մարդ»,-ասաց Բադալյանը:

Քաղտեխնոլոգը միևնույն ժամանակ ընդգծեց, որ ընդդիմությունը թե՛ խորհրդարանի ներսում, թե՛ խորհրդարանից դուրս շատ մեխանիզմներ ունի, որոնք հիմա ընդհանրապես չի կիրառում, իսկ կիրառման դեպքում 100%-անոց արդյունք կունենա, ընդհուպ մինչև՝ իշխանափոխություն:

Հիշեցնենք, որ այսօր ընդդիմադիր «Հայաստան» և «Պատիվ ունեմ» խմբակցությունները հայտարարել են, որ ստեղծված իրավիճակում անընդունելի եւ սխալ ենք համարում նախագահի ընտրություններին մասնակցելը:

Աղբյուր` Փաստինֆո