Փաստ ինֆո

Կառավարությունը ՀՀ շուրջ 9 համայնքների՝ Արագածոտնի, Արմավիրի, Գեղարքունիքի, Լոռու, Շիրակի, Վայոց ձորի մարզպետարաններին 2022 թվականի բյուջեից 1 մլրդ 608 մլն դրամ հատկացրեց՝ 62 սուբվենցիոն ծրագրի շրջանակում:

Տարածքային կառավարման և ենթակառուցվածքների նախարար Գնել Սանոսյանը հայտնեց, որ գումարի հատկացմամբ կիրականացվեն շինարարական կազմակերպությունների նկատմամբ ֆինանսական պարտավորությունները և հնարավորություն կտան նախատեսված ծրագրերն ավարտին հասցնել:

Նիկոլ Փաշինյանն էլ, անդրադառնալով նախագծին, հայտարարեց, թե Հայաստանում ժողովրդավարության առումով շատ լուրջ առաջընթաց կա.

«Պետք է արձանագրեմ՝ շատ կարևոր է, որ այս առաջընթացը ոչ թե կառավարությունն է արձանագրում, այլ՝ միջազգային հանրությունը: ԵԽԽՎ-ում նախորդ շաբաթ ընդունվեց նախադեպը չունեցող բանաձև, որում արձանագրվում էր Հայաստանում ժողովրդավարական բարեփոխումների շատ էական առաջընթացը»,-ասաց նա:

Ըստ Նիկոլ Փաշինյանի՝ իր այս հայտարարությունը քննարկվող նախագծի հետ կապ ունի այնքանով, որ ՏԻՄ ընտրություններում հաղթում են ոչ միայն իշխող կուսակցության, այլ՝ ընդդիմադիր ուժերի ներկայացուցիչներ.

«Ոմանք հընթացս են դառնում ընդդիմադիր, ինչը քաղաքական տրամաբանության և ժողովրդավարության հետ այնքան էլ կապ չունի, սա կուլտուրայի հարց է»,-ասաց նա:

Նիկոլ Փաշինյանը նկատեց, որ երբեմն համայնքների ներկայացուցիչները փորձ են անում ներկայացնել, թե համայնքներում իրականացվող սուբվեցիոն ծրագրերն իրականացվում են ի հեճուկս Կառավարության.

«Տպավորություն է, որ Կառավարությունը դիմադրում է, իրենք էլ, հաղթահարելով այդ դիմադրությունը, բարեփոխումներ են անում: Ես կարծում եմ, որ այն համեստությունը, որ մենք այս ընթացքում ցուցաբերել ենք, այլևս տեղին չէ»,-ասաց նա և հորդորեց մարզպետներին և կառավարության ներկայացուցիչներին, որ սուբվենցիոն ծրագրերի բովանդակությունը հստակ ներկայացնեն հանրությանը:

ՏԿԵ նախարար Գնել Սանոսյանը ներկայացրեց այն համայնքների ֆինանսավորումը, որն իրականացնում է կառավարությունը, ինչից հետո Փաշինյանն արձագանքեց․

«Որ այսպես շարունակեք, ես այստեղ ներիշխանական դավադրություն եմ տեսնելու, որ համայնքներին որքան ավելի շատ ենք ֆինանսավորում, այնքան ակտիվ կառավարության հրաժարականն են պահանջում»։

Աղբյուր` Փաստինֆո