Փաստ ինֆո

Բարձր տեխնոլոգիական արդյունաբերության նախարար Վահագն Խաչատուրյանն առաջադրվել է նախագահի թեկնածու: Ընդ որում՝ առաջադրվել է ԱԺ 65 պատգամավորների կողմից, ինչը որոշակի վստահություն է հաղորդում, որ պրն Խաչատուրյանը ոչ միայն առաջադրվել է, այլ նաև կընտրվի Հանրապետության նախագահի պաշտոնում: Այս մասին կառավարության նիստի ժամանակ հայտարարեց վարչապետ Նիկոլ Փաշինյանը:

Փաշինյանը հույս հայտնեց, որ մինչև նախագահի արտահերթ ընտրությունները, որը մարտին է տեղի ունենալու, Վահագն Խաչատուրյանը լիարժեք կկատարի ԲՏԱ նախարարի դերակատարումը. «Այս ընթացքում կշարունակենք միասին արդյունավետ աշխատել Կառավարությունում»,-ասաց ՀՀ վարչապետը:

Վահագն Խաչատուրյանն էլ շնորհակալություն հայտնեց Նիկոլ Փաշինյանին՝ վստահության համար.

«Ես հասկանում եմ՝ քաղաքական ուժի համար ինչ է նշանակում թեկնածու առաջադրել, քաղաքական կուսակցության ներսում հաստատ արժանի ավելի մարդիկ կան, բայց կուսակցության այդ որոշումը շատ բարձր գնահատականի է արժանի։ Դա նշանակում է՝ վեր կանգնել ամեն ինչից՝ հանուն այն նպատակների, որով առաջնորդվում է այսօրվա իշխանությունը»,-ասաց նա:

Նախարարը նաև շնորհակալություն հայտնեց, ՔՊ-ական պատգամավորներին, որոնք առաջադրել են իր թեկնածությունը:
Նիկոլ Փաշինյանն էլ ընդգծեց, որ Սահմանադրության բերումով, հանրապետության նախագահը վերկուսակցական գործունեություն է ծավալում, առաջնորդվում է ազգային և համազգային շահերով.

«Ես հավատացած եմ, որ Կառավարությունը և Խորհրդարանը նույնպես առաջնորդվում են պետական, ազգային և համազգային շահերով: Այստեղ պետք է գործի իշխանությունների բաժանման սկզբունքը: Սահմանադրությունը հստակ գծագրել՝ թե իշխանության տարբեր թևեր ինչ լիազորություններ ունեն և ինչպես պետք է համագործակցեն»,-ասաց նա և հավելեց, որ շատ է կարևորում, որ իշխանության ճյուղերը մեկը մյուսին լրացնեն, այլ ոչ թե՝ հակադրվեն:

Նա նաև հայտարարեց, որ ՔՊ խմբակցության որոշ պատգամավորները չեն ստորագրել Վահագն Խաչատուրյանին՝ նախագահի թեկնածու առաջադրման փաստաթուղթը՝ տեխնիկական-իրավական պատճառներով.

«ԱԺ նախագահի պատգամավորական գործունեությունը կասեցված է, նա ներկայումս կատարում է նախագահի լիազորությունները, խմբակցության մյուս պատգամավորները գործուղման մեջ են, Հանրապետությունում չեն և առաջադրման փաստաթուղթը չեն ստորագրել այս բերումով»,-ասաց նա և հավելեց, Վահագն Խաչատուրյանի թեկնածությունն առաջադրման մասով ՔՊ կուսակցության վարչության և ՔՊ խմբակցության միջև կա ներդաշնակություն, ինչ վստահություն է տալիս, որ առնվազ երկրորդ փուլում նախագահի ընտրությունը կկայանա, և մենք կշարունակենք մեր գործունեությունը արդեն նոր կարգավիճակենրով, որից հյետո կառավարության կազմում կլինի համալրում՝ նոր նախարար կնշանակվի:

Աղբյուր` Փաստինֆո