Փաստ ինֆո

«Գործ ունենք իրավական համակարգի, օրինականության կազմաքանդման, դատավորների վրա տարած ճնշումների հետ»,- լրագրողների հետ զրույցում ասաց դատավոր Բորիս Բախշիյանի փաստաբան Երեմ Սարգսյանը:

«Իրականում բացառիկ իրավիճակ է, տարիներով հետ ենք գնացել, ժողովրդավարությունն անկում է ապրում, թող որևէ մեկը ձևական չասի, թե այստեղ օրինական պրոցեսներ են տեղի ունենում, մենք գործ ունենք կոնկրետ դատավորի գործունեության միջամտության հետ, երբ դատավորը որոշում է կայացրել իր համոզմունքներով գործի փաստերի հիման վրա և այդ որոշումը չի բողեքարկվել դատախազության կողմից Վերաքննիչ դատարան։

Հիմա եկել են քննիչն ու դատախազը որոշել են, որ դատարանի օրինական ուժի մեջ մտած դատական ակտը, որը կասկածի տակ դնելու բացարձակ իրավունք չունեն, այսօր ասում են բավարար չի, որ ապօրինի է»,-ասաց փաստաբանն ու հարց բարձրացրեց, թե ինչի՞ համար են վերաքննիչ դատարանն ու վճռաբեկ դատարանները, որ առաջին ատյանի դատարանը մեկ այլ դատավորի օրինական ուժի մեջ մտած դատական ակտի վերաբերյալ կարծիք հայտնի՝ որոշումը օրինական է, թե չէ, եթե դրա համար կա Վերաքննիչ դատարան։

Փաստաբանը նկատեց, որ այն դատավորին, որը չի ենթարկվում և ինքնուրույն է որոշում կայացնում, ճնշում կա՝ պատժելու, լիազորությունները կասեցնելու ուղղությամբ:

«Սա ի՞նչ է նշանակում, որ այսօր գործ անող դատավորը, եթե որոշում կայացնի, կարող են առանց որևէ բողոքարկումների մի հատ էլ քրեական գործ հարուցեն»:

Աղբյուր` Փաստինֆո