Փաստ ինֆո

Սյունիքի մարզի ընդհանուր իրավասության դատարանի դատավոր Բորիս Բախշիյանի պաշտպանները դատավոր Դավիթ Արղամանյանին ինքնաբացարկի միջնորդություն են ներկայացրել։

«Փաստինֆո»-ի թղթակցի հաղորդմամբ՝ դատական նիստին պաշտպանության կողմը բարձրաձայնել է ձեռքով մակագրման հարցը, մասնավորապես, արդյոք գործը ձեռքով է մակագրվել դատավոր Արղամանյանին և արդյոք պահպանվել է օրենքով սահմանված կարգը։ Սարգսյանն ընդգծեց, որ ցանկացած գործ որևէ դատավորի մակագրելիս պետք է ապահովվի պատահական ընտրությունը, այլ ոչ թե՝ դատարանի նախագահը կոնկրետ դատավորի ընտրի, որովհետև վստահ է, որ այս գործի պարագայում տվյալ դատավորը կբավարարի միջնորդությունը։ Փաստաբանը հայտնեց, որ հարցումներ է ուղարկել դատարանի նախագահին և ստացված պատասխանից ակնհայտ է, որ դատարանի նախագահը չի պահպանել գործերի մակագրման պատահականության սկզբունքը, ինչը նշանակում է, որ դատարանը համարվում է օրենքի հիման վրա չստեղծված։ Պաշտպանը նաև հիշեցրեց ՄԻՊ-ի տարածած հայտարարությունը, որ որոշակի կատեգորիայի գործեր քննում են կոնկրետ դատավորներ և կան դատավորներ, որոնք մեկուսացված են և պաշտպանության կողմը կասկած ունի, որ գործը հատուկ է մակագրվել Արղամանյանին։

Երևանի ընդհանուր իրավասության դատարանը՝ դատավոր Դավիթ Արղամանյանի նախագահությամբ, հեռացել է խորհրդակցական սենյակ՝ ինքնաբացարկի վերաբերյալ որոշում կայացնելու։ Որոշումը կհրապարակվի վաղը՝ ժամը 10.00-ին։

Հիշեցնենք, որ ՀՀ գլխավոր դատախազը ՀՀ ԱԱԾ քննչական դեպարտամենտում քննվող քրեական գործի շրջանակներում, օրենքով սահմանված կարգով, ՀՀ ԲԴԽ-ին ներկայացրել է Սյունիքի մարզի ընդհանուր իրավասության առաջին ատյանի դատարանի դատավոր Բորիս Բախշիյանի նկատմամբ քրեական հետապնդում հարուցելուն և նրան ազատությունից զրկելուն համաձայնություն տալու միջնորդություններ, որոնք ԲԴԽ-ի կողմից բավարարվել են։

Նշենք, որ դատավորի նկատմամբ հետապնդում է իրականացվում՝ Մանվել Փարամազյանի դեմ ցուցմունք տված Նիկոլ Փաշինյանի աջակցին կալանավորելու համար, թեև ամբաստանյալն ինքն էր դրսևորել ոչ պատշաճ վարքագիծ՝ չներկայանալով դատական նիստերին։ Քրեական գործը, որի շրջանակներում դատավորին մեղադրանք է առաջադրվել, հարուցվել է ՀՀ քրեական օրենսգրքի 348-րդ հոդվածի 3-րդ մասով՝ անձին ապօրինի կալանավորելու հատկանիշներով, որն առաջացրել է ծանր հետևանք։ ԱԱԾ-ն միջնորդություն է ներկայացրել դատարան՝ դատավորի նկատմամբ կալանավորումը որպես խափանման միջոց ընտրելու մասին, որը մակագրվել է դատավոր Դավիթ Արղամանյանին։ Դատավորների միությունը մտահոգություն է հայտնել Սյունիքի մարզի առաջին ատյանի ընդհանուր իրավասության դատարանի դատավոր Բորիս Բախշիյանի նկատմամբ դատախազության և ԱԱԾ քննչական դեպարտամենտի կողմից քրեական հետապնդում իրականացնելու և անձեռնմխելիությունից (այդ թվում անձնական ազատությունից) զրկելով զուգորդված քրեական հետապնդում իրականացնելու գործընթացի հետ կապված, որը պայմանավորված է դատավորի գործունեության հետ։
Նշենք, որ դատավոր Բորիս Բախշիյանի վարույթում է գտնվում Սիսական ջոկատի լեգենդար հրամանատար Աշոտ Մինասյանի՝ Աշոտ Երկաթի գործը։ Օրերս դատավոր Բախշիյանը որոշում էր կայացրել՝

Մինասյանի նկատմամբ ընտրված խափանման միջոց կալանավորումը գրավով փոխարինելու մասին, ինչից հետո Մինասյանն ազատ է արձակվել։ Դատավոր Բորիս Բախշիյանի վարույթում են գտնվում նաև Քաջարանի համայնքապետ Մանվել Փարամազյանի և Գորիսի փոխքաղաքապետ Մենուա Հովսեփյանի վերաբերյալ քրեական գործերը։

Հեղինակ՝ Իզաբել Սահակյան

Աղբյուր` Փաստինֆո