Փաստ ինֆո

ԼՀԿ-ն պետք է զգուշանա ՕԵԿ-ի հետ ասոցացվելուց, «սփոյլեր» կուսակցություն դառնալը լավ չէ: «Փաստինֆո»-ի հետ զրույցում նման դիտարկում արեց քաղտեխնոլոգ Վիգեն Հակոբյանը:

Քաղտեխնոլոգի արձանագրմամբ՝ տպավորություն է, որ «Լուսավոր Հայաստանը» որոշ դեպքերում իր վրա է վերցնում այն գործառույթները, որոնք ՔՊ-ն չի ուզում իր դեմքով անել:

«ԼՀԿ-ի գործողությունները որոշ դեպքերում նպաստում են ՔՊ-ի գործողություններին, շատ դեպքերում ԼՀԿ-ն իր վրա է վերցրել այն գործառույթները, որոնք ՔՊ-ն չի ցանկանում իր անունից անել։ Չեմ ուզում պնդել, բայց այդ տպավորությունն է ստեղծվել: Հայտարարություններ են հնչում, հարցեր են օրակարգ բերվում, որոնք ավելի նպաստավոր են ՔՊ-ի համար, սակայն ՔՊ-ն չի բարձրացնում այդ օրակարգը»,-ասաց զրուցակիցը՝ նկատելով՝ ԼՀԿ-ի խորհրդարանում եղած ժամանակ էլ նման էլեմենտներ կային:

Ըստ Հակոբյանի՝ ԼՀԿ-ն, քողարկված, երբեմն՝ վատ քողարկված ձևով, այնպիսի գործողություններ է անում, որ շատերի մոտ տպավորություն է ստեղծվում, թե դրանք ՔՊ-ի հետ համաձայնված գործողություններ են:

Դիտարկմանը, որ կարծիքներ են հնչում, թե ԼՀԿ-ն վարում է ՕԵԿ-ի քաղաքական գիծը, որն էլ ժամանակին նախկին իշխանություններին հարելով, փորձում էր իր տեղն ամրապնդել քաղաքական դաշտում, փորձագետը նկատեց.

«ՕԵԿ-ը որոշակի քաղաքական կլիշե է, որը ենթադրում է որոշակի քաղաքական հետագիծ, երբ ասում ես ՕԵԿ, արդեն անհրաժեշտություն էլ չկա բացատրելու՝ ինչ նկատի ունես: Ես կարծում եմ, որ ԼՀԿ-ն, ամեն դեպքում, պետք է շատ զգույշ լինի, որպեսզի այդ անալոգիան իրեն չկպնի: Եթե արդեն համեմատելու տենդենց կա, դա արդեն ԼՀԿ-ի համար լավ չէ: Եթե այդ համեմատությունն իրեն կպնի, այդ ժամանակ ԼՀԿ-ն իսկապես կկորցնի իր ուրույն դերը քաղաքական դաշտում, ինչպես ՕԵԿ-ը կորցրեց, շատ վատ է «սփոյլեր» կուսակցություն դառնալը»,-ասաց քաղտեխնոլոգը և ընդգծեց՝ ԼՀԿ-ն պետք է վերլուծի՝ ինչո՞վ է պայմանավորված այդ կարծիքի ձևավորումը.

Նշենք, որ ԼՀԿ-ի գործադրած ջանքերի շնորհիվ այս Վանաձոր համայնքը պարալիզացվել է. Թեեւ ընդդիմությունը հաղթել է, բայց չի կարողանում համայնքի ղեկավար ընտրել։

Այստեղ ամենաշատ ձայներն ստացել է «Մամիկոն Ասլանյան» դաշինքը՝ ստանալով ընտրողների 38.70 տոկոսի վստահության քվեն, ՔՊ-ն երկրորդ տեղում է՝ 25,05 կողմ ձայնով, ՀԱՍԿ-ը՝ 14,53 կողմ ձայնով երրորդ, «Հայրենիքը»՝ 4,48 կողմ ձայնով չորրորդ տեղում, իսկ «Ապրելու երկիրը»՝ եզրափակում է հնգյակը՝ 4,29 տոկոս ձայնով։ Ընդդիմադիր ուժերը համաձայնության են քաղաքային իշխանություն ձեւավորելու հարցում, բայց 6-րդ տեղը զբաղեցրած ԼՀԿ-ն, որը չի անցել ավագանի, դիմել էր դատարան՝ ընտրությունների արդյունքները վիճարկելու համար։ Վարչական դատարանը հայցը մերժել է, բայց դեռ ուժի մեջ է համայնքապետ ընտրելու նպատակով ավագանու նիստ հրավիրելու արգելքը։ Ավելին, հիմա էլ փորձում են պատասխանատվության ենթարկել հայցը մերժած դատարանի՝ նախագահող դատավորին։

«ԼՀԿ-ն պետք է զգուշանա ՕԵԿ-ի հետ ասոցացվելուց, դա շատ վտանգավոր է իր համար»,-հավելեց Վիգեն Հակոբյանը:

Աղբյուր` Փաստինֆո