Փաստ ինֆո

Վարչական դատարանի փետրվարի 2-ի վճիռը` Վարդենիս համայնքի ղեկավար Ահարոն Խաչատրյանին ընտրելու վերաբերյալ ավագանու որոշումն անվավեր ճանաչելու մասին, կբողոքարկվի վարչական վերաքննիչ դատարանում: Այս մասին
«Փաստինֆո»-ին հայտնել է «Ահարոն Խաչատրյան» դաշինքի շահերի ներկայացուցիչ Վարազդատ Հարությունյանը:

Հիշեցնենք, որ Վարդենիսի ավագանու դեկտեմբերի 30-ի նիստում ընդդիմադիր «Ահարոն Խաչատրյան» և «Միասնական Վարդենիս» խմբակցությունները համայնքապետ ընտրեցին Ահարոն Խաչատրյանին, որից հետո ՔՊ-ն դիմել էր դատարան՝պահանջելով չեղյալ համարել ավագանու անդրանիկ նիստը, որի ժամանակ համայնքապետ էր ընտրվել ընդդիմության թեկնածուն, ինչպես նաեւ ընդհանրապես անվավեր ճանաչվի համայնքի ղեկավարի ընտրությունը:

Վարչական դատարանը, նախագահությամբ դատավոր Մերի Համբարձումյանի, փետրվարի 2-ին, մասնակի բավարարել է հայցը եւ անվավեր ճանաչել այն որոշումը, որով արձանագրվել էր, որ Վարդենիս խոշորացված համայնքի ղեկավար է ընտրվել Ահարոն Խաչատրյանը։ Իսկ համայնքի ղեկավարի ընտրությունն անվավեր ճանաչելու մասով` մերժել:

Դատարանի անհասկանալի որոշումը կողմերն արդեն ստացել են: «Որոշումն արդեն ստացել ենք, մոտ օրերս կբողոքարկենք»,-ասաց նա։

Ավելի վաղ Գեղամասար համայնքի ղեկավար Հակոբ Ավետյանը «Փաստինֆո»-ին հայտնել էր, որ դատավորը գտնվում է ճնշման տակ, որպիսի տպավորություն ձեւավորվել էր դատական նիստից:

«Պարզ երևում է , որ ամեն ինչ պատվերի տակ է, դատավորը ջահել աղջիկ էր, անճար վիճակում էր, պատվեր էր, պետք է կատարեր»,-ասել էր Ավետյանը:

Աղբյուր` Փաստինֆո