Փաստ ինֆո

Մենք պատկերացնում ենք, որ մի օր դատախազությունը կամ ԲԴԽ-ն գալու են հայտարարեն՝ սիրելի հայրենակիցներ, մենք իրականացնում ենք քաղաքական հետապնդում կամ սելեկտիվ արդարադատությու՞ն. Դա երբեք չեք տեսնելու: Այս մասին խորհրդարանում լրագրողների հետ զրույցում ասաց «Հայաստան» խմբակցության պատգամավոր Արամ Վարդևանյանն՝ անդրադառնալով Սյունիքի մարզի առաջին ատյանի ընդհանուր իրավասության դատարանի դատավոր Բորիս Բախշիյանի նկատմամբ քրեական հետապնդում իրականացնելու գործընթացին։

Ըստ պատգամավորի՝ ԲԴԽ-ն, որը Սահմանադրությամբ կոչված է պաշտպանելու դատավորներին, երաշխավորելու դատավորների անկախությունը, իրականում հակառակն է անում.

«ԲԴԽ-ն միաձայն որոշել է՝ դատավորին թող հետապնդեն, թող տանեն, կալանավորեն: ԲԴԽ 9 անդամների մոտ հարց չի առաջանու՞մ, ինչու են դատավոր Բորիս Բախշիյանին հենց հիմա հիշել, ո՞նց է ստացվում, որ 2019թ-ին դատավոր Դավիթ Գրիգորյանի մասին հիշեցին Ռոբերտ Քոչարյանին ազատ արձակելուց հետո: Ցանկացած անաչառ դիտորդ, եթե այս ամենը տեսնի, կարո՞ղ է համոզված լինել դրանում, որ այստեղ ոչ մի պատահականություն չկա: Հետևաբար, եթե հիմա են որոշել հետապնդում սկսել, վստահեցնում եմ, բացառապես պայմանավորված է այն հանգամանքով, որ կոնկրետ այս դատավորը վերջին ժամանակահատվածում ցուցաբերել է իրական անկախությունը: Կարծես Աշոտ Երկաթի գործը համբերության բաժակը լցվելու վերջին փուլն էր»,-ասաց նա:

Պատգամավորի խոսքով՝ իշխանություններն իրենց ոչ հաճո որոշումներ կայացնող դատավորների նկատմամբ ճնշումներ են գործադրում, ընդհուպ՝ կալանավորման հարց են բարձրացնում.

«Ոչ մի իշխանություն հավերժ չէ: Սադամ Հուսեյն էլ էր ասում, որ ոչ մեկի նկատմամբ ռեպրեսիա չի իրականացվում, որ Իրաքի դատարաններն աշխարհի ամենաարդար դատարաններն են, բայց մարդկանց տանում էին, տարիներով անազատության մեջ էին պահում, այլակարծությունն էին ճնշում, լրագրողներին էին քաշքշում: Սա՞ է իրականում ժողովրդավարությունը»,-ասաց նա:

Աղբյուր` Փաստինֆո