Փաստ ինֆո

Սերժ Սարգսյանի ասուլիսը փոխադարձ մեղադրանքների մասին էր, նա իրավիճակից դուրս գալու ելքեր չմատնանշեց, հանրության սպասելիքները չարդարացրեց: «Փաստինֆո»-ի հետ զրույցում նման կարծիք հայտնեց քաղաքական վերլուծաբան Արմեն Բաղդասարյանը՝ անդրադառնալով ՀՀ երրորդ նախագահ Սերժ Սարգսյանի երեկվա ասուլիսին:

Ըստ զրուցակցի՝ Սերժ Սարգսյանի հիմնական ասելիքը հետևյալն էր. քանի որ Նիկոլ Փաշինյանն այսօրվա իրավիճակի համար ամբողջողովին նախկիններին է մեղադրում, այդ թվում՝ Սերժ Սարգսյանին, նա էլ իր հերթին փորձեց հիմնավորել, թե նախկինում ամեն ինչ լավ է եղել, Նիկոլ Փաշինյանն ընդամենը մոլորեցնում է ժողովրդին, իրականում այս ամեն ինչի համար պատասխանատուն Նիկոլ Փաշինյանն է.

«Փոխադարձ մեղադրանքներն էին, իսկ ճշմարտությունն այդ ամենի միջակայքում է, այն իմաստով,որ Նիկոլ Փաշինյանը շարունակել է այն քաղաքական գիծը, որը տարիներ շարունակ վարել են Ռոբերտ Քոչարյանը և Սերժ Սարգսյանը, պարզապես Փաշինյանի արածը շատ ավելի ծանր հանցանք է, այն պատճառով, որ նա կարող էր ավելի քիչ զիջումներով խնդիրը կարգավորել, սակայն չարեց, ինքն էլ խոստովանում է, որ եթե այդպես աներ, իրեն կասեին՝ դավաճան, այսինքն նա գիտակցաբար այդպիսի ծանր արհավիրք է բերել Հայաստանի և Արցախի գլխին: Նրա արածն ավելի կործանարար հետևանքներ ունեցավ, քանի կարող էր ինչ-որ բան փոխել , բայց չարեց»,-ասաց Արմեն Բաղդասարյանը:

Փորձագետի արձանագրմամբ՝ Սերժ Սարգսյանը ԼՂ հարցի կարգավորման հետ կապված որևէ բացահայտում չարեց, ասեց այն, ինչ գիտեր հանրությունը:

Արմեն Բաղդասարյանը նաև ընդգծեց, որ հանրությունը Սերժ Սարգսյանից ակնկալում էր հստակ ելքեր ստեղծված իրավիճակից դուրս գալու համար, սակայն նա այդպես էլ չարդարացրեց հասարակության սպասելիքները.

«Բոլորը տեսնում են, թե Նիկոլ Փաշինյանի իշխանությունն ինչ է բերում մեր պետության գլխին, իսկ հասարակությունը, որպես ընդդիմադիր կուսակցություններից մեկի առաջնորդ, լրիվ այլ ակնկալիքներ ուներ նրանից: Հասարակությունն ակնկալում էր մի շարք հարցերի պատասխաններ՝ ի՞նչ պետք է արվի իրավիճակից դուրս գալու համար, ի՞նչ պետք է անեն ընդդիմությունը և մյուս քաղաքական ուժերը, սակայն Սերժ Սարգսյանը պետությունն այս վիճակից դուրս բերելու ելքեր մատնանշելու փոխարեն արդարանում էր, որ այս ամենի հետ կապ չունի»,-ասաց փորձագետը և հավելեց.«Բոլորը գիտեն, որ այս իրավիճակի մեծագույն մեղավորներն այսօրվա իշխանություններն են՝

Նիկոլ Փաշինյանի գլխավորությամբ, Սերժ Սարգսյանը իրավիճակից դուրս գալու ելքեր չմատնանշեց, պետք էր հստակ նշել՝ ինչպե՞ս են պատրաստվում ձերբազատվել այս իշխանություններից, և որո՞նք են լինելու Հայաստանի հաջորդ քայլերը»:

Աղբյուր` Փաստինֆո