Փաստ ինֆո

«Հիմա եթե չտեղեկանայինք ու չբարձրաձայնեինք, օրենքը թաքուն էր ուժի մեջ մտնելու, սա երկար ժամանակ որոշված էր, բայց ոչ ոք տեղյակ չէր եղել, բացահայտեցինք »,- «Փաստինֆո»-ին ասել է վարորդների իրավունքների պաշտպան Արտակ Խաչատուրովը: 

ԱՊՊԱ-ի վճարների թանկացման մասին վարորդները բարձրաձայնել են այսօր՝ բողոքի ակցիա իրականացնելով Հանրապետության հրապարակում, որի ժամանակ ոստիկանությունը մի քանի վարորդի, բիրտ ուժի կիրառմամբ, բերման էր ենթարկել։

Ա. Խաչատուրով փոխանցմամբ՝ ազատ են արձակվել բերման ենթարկված ակցիայի մասնակից վարորդներից 4-ին, որոնցից մեկը քթի արյունահոսություն է ունեցել, եւ նրան բժշկական օգնություն է ցուցաբերվել իսկ 5-րդի վերաբերյալ դեռ տեղեկություն չունեն։ : «Փաստացի իրավիճակով պայմանավորված հետագայում ավելի շատ է թանկանալու, ըստ դեպքերի տարբերության մինչև մոտ 100 հազար»,- ասել է մեր զրուցակիցը՝ նշելով, որ թանկացումների համար որեւէ հիմնավորում չի ներկայացվել։

Նրա արձանագրմամբ՝ սա վերաբերում է ճանապարհային երթևեկության անվտանգությանը, որի օրենսդրական երաշխավորը ԱԺ-ն է, բայց կատարման երաշխավորը ոստիկանությունն է.-«Հիմա կողմնորոշվելու խնդիր կա, կամ ԱԺ-ն այդ գործով զբաղվի, կամ ոստիկանությունը»,-ասել է մեր զրուցակիցը՝ անհասկանալի համարելով թանկացման համար ներկայացված հիմնավորումները ։

«Իրենք երկար-բարակ հիմնավորումը բերում են, բայց դա ինձ համար պատճառ չէ: Օրինակ՝ Ապահովագրական ընկերությունների սպասարկման որակը վատն է, եկեք 3000 դրամ թանկացնենք, սպասարկման որակը լավանա: Սա հիմնավոր պատճառաբանություն չէ ինձ համար»,- ասում է Խաչատուրովը ու նշում, որ օրենքի ուժի մեջ մտնելու տարբեր ժամանակացույցներ է նշված, եթե այս օրենքը չչեղարկվի, նրանք կշարունակեն բողոքի ակցիաները, կներառեն նաեւ այլ պահանջներ: Հաջորդ ակցիան նախատեսում են այս չորեքշաբթի, որն ուղղված է հստակ գործառույթն իրականացնող Կենտրոնական բանկին և Ավտոապահովագրական բյուրոյին:

Աղբյուր` Փաստինֆո