Փաստ ինֆո

Երեկվանից տեղական լրատվական կայքերը անդրադառնում ու նաև՝ ահազանգում են, թե՝ անցյալ շաբաթ հրաժարական տված ՀՀ նախագահի քպական թեկնածուն բարձր տեխնոլոգիաների նախարար Վահագն Խաչատրյանն է, ով, ի դեպ, նախարար դառնալուց հետո իր ազգանվան մեջ միտումնավոր «ու» տառ ներմուծեց՝ դառնալով՝ Խաչատուրյան։

Նրա նշանակմանը բարձր տեխնոլոգիաների նախարարի պաշտոնում «Փաստինֆո»-ն անդրադարձել է այն համատեքստում, որ ԱԺ հունիսյան ընտրություններից հետո «թավշյա իշխանության մեջ զգալի շատացան ՀՀՇ-ական նախկինները օրենսդիրում և գործադիրում, որոնցից մեկն էլ Վահագն Խաչատրյանն էր։

Իրականում դեռ 2018-ի ստի հեղափոխության օրերին էր Խաչատրյանը քպականների համար ակտիվ խորհրդատուի դեր կատարում։ Իսկ ընտրությունից հետո թոշակային և նախաթոշակային տարիքում գտնվող ակտիվիստների համար խորհրդատվական գործունեությունը օրենսդիր և գործադիր տեղափոխվելով արտահայտվեց։ Իհարկե, խոսքը տերպետրոսյանականների այն հատվածի մասին է, որոնց համար Փաշինյանի ենթակայությամբ աշխատելը և նրա բռնակալական մաներաները հանդուրժելի էին։ Ցայտուն դեմքերը, ի սկզբանե անհանդուրժելի էին հե՛նց Փաշինյանի համար։ Քանի որ ստի հեղափոխության օրերից սկսած նա հերքելով հերքում էր իր և իր հոգևոր հոր կապն ու գործողությունները։ Դրանք այսօր սինքրոն շարունակվում են, քանի որ Հայաստանի թրքամետ քաղաքականության գաղափարախոսը եղել է Տեր-Պետրոսյանը։ Ընդամենը կատարողն է Փաշինյանը՝ բռի, արյունալի, ատելությամբ ու քենով լի, ազգադավ․․․

Հիմա, ի՞նչ սպասելիքներ պիտի ունենա հայ մարդը Վահագն Խաչատուրյանից։ Բնականաբար, ոչ մի։ Փաշինյանի կառավարության անդամը դառնում է Փաշինյանի նախընտրելի նախագահը։ Պարզապես, նա մեկն է, որ ինչ-որ ժամանակ եղել է Տեր-Պետրոսյանի խորհրդականը, 2018-ից՝ նաև՝Փաշինյանի խորհրդատուն։

Անկեղծ ասած, առանձնապես հասկանալի չէ նախկին հհշական կամ ՀԱԿ-ականների սրտնեղությունը, որ ծանր են տանում Վահագն Խաչատրյանի թեկնածությունը՝ նախագահական նստավայրում, քանզի վերջինս կենսագրականում «մոռացել» է իր կյանքի ՀՀՇ-ական և ՀԱԿ-ական շրջանը։

Նրանք, թերևս, հիշում են՝ ՀՀ 1-ին նախագահ Լևոն Տեր-Պետրոսյանն էր, որ իր ժամկետը չսպառելով հեռացավ, նա էր, որ 2008-ի փետրվարին 20 տոկոս հավաքելով և իրեն ընտրված նախագահ համարելով՝ «ցույցերի ժամանակ հայտարարում էր, թե՝ ինքն ընտրված նախագահ է, ժողովուրդն է իրեն տանելու Բաղրամյան 26»։

Ինչ խոսք, Փաշինյանի ընտրած նախագահը ժողովրդի հետ ոչ մի տոկոսի կապ չունի, նա բոլորովին այլ է, բայց ժամանակներն էլ այլ են՝ վայրագ են և․․․ «ժողովրդավար»։

Դասականությունից շատ հեռու․․․

Աղբյուր` Փաստինֆո