Փաստ ինֆո

Այս պահին դեռևս ԱԺ նախագահի որոշում չկա, որով դադարեցվում է գործող նախագահի լիազորությունները, ուստի գեղեցիկ չի լինի, որ ես այսօր որևէ մեկնաբանություն անեմ դրա վերաբերյալ: Դեռևս Արմեն Սարգսյանը հնարավորություն ունի, կարող է իր դիմումը հետ վերցնել:

Այս մասին լրագրողների հետ զրույցում ասաց ԲՏԱ նախարար Վահագն Խաչատուրյանն՝ անդրադառնալով նախագահի պաշտոնում իր թեկնածությունն առաջադրելու տեղեկություններին:

Ըստ Խաչատուրյանի՝ նախագահի պաշտոնում առաջադրվելու համար նա համապատասխանում է պահանջվող չափանիշներին.

«Տեսականորեն իմ անունը պետք է շրջանառվեր՝ հաշվի առնելով պահանջվող չափանիշները՝ 40 տարեկանից բարձր, ՀՀ քաղաքացի, ճանապարհ անցած մարդ, այս պայմաններում կարելի էր ենթարդրել, որ ես կարող եմ հայտնվել նախագահի թեկնածուների ցուցակում»,-ասաց նա:

Դիտարկմանը, որ պաշտոնական կայքէջերում իր կենսագրությունը խմբագրված է, որևէ հիշատակում չկա ՀԱԿ անդամակցության մասին, նախարարն ասաց, որ մեղավորությունն իրենն է.

«Ես 2017թ-ի ընտրություններից հետո իմ կուսակցական գործունեությունը դադարեցրել եմ, համարում եմ ինձ անկուսակցական: Ինքս իմ մեջ կուսակցության գործունեությունը դադարեցրել եմ, պարզապես ֆորմալ առումով դիմում լինել, չլինելու հարցն է»,-ասաց նա:

Հարցին՝ ո՞ր պաշտոնում ավելի շատ օգուտ կտա, Խաչատուրյանն արձագանքեց.

«Բարդ հարց եք տալիս, այն պաշտոնում, որտեղ գտնվում եմ, այս 6 ամսում ես ինձ բավականին լավ եմ զգում, որովհետև տեսնում եմ հեռանկարներ: Հիմա համոզված եմ, որ շատ ավելին կարող ենք անել, որովհետև մեր նախարարությունում կա շատ լավ աշխատող թիմ, ամենակարևորը՝ կառավարությունում կա հասկացողություն գնահատելու այն ամենը, ինչ արել ենք և ուզում ենք անել: Հավատացած եղեք, որ շատ ծրագրեր կան, որոնք կարվեն: Հիմա ընթացքը ցույց կտա, եթե ինչ-որ բան փոխվի, կափսոսամ, բայց կյանքն այդպիսին է: Իմ կյանքում այդպես եղել է, երբ ինչ-որ բան սկսում ես նորից, բայց կախված է եղել, թե տրամադրվածությունն ինչպիսին է»:

Նա նաև նշեց, որ իր համար անակնկալ էր նախագահ Արմեն Սարգսյանը հրաժարականը. «Դրանից առաջ իմ մտքով էլ չէր կարող անցնել, որ կարող եմ դառնալ այդ պաշտոնի մասին գոնե մտածող մարդ: Ես իմ գործն անում էի, գործս շատ էր, ինչ-որ ձևով կարողացա իմ համեմատաբար ազատ կյանքից հարմարվել ավելի սահմանափակ կյանքին, բավականին գոհ եմ, որ այդ հնարավորությունն ընձեռնվել է, որովհետև ինքնաճանաչողության մի շրջան էր»:

Հարցին՝ Նիկոլ Փաշինյանից առաջարկ եղել է իր թեկնածությունն առաջադրելու վերաբերյալ՝ Վահագն Խաչատուրյանն ասաց. «Այդպիսի խոսակցություն դեռևս չի եղել»։

Աղբյուր` Փաստինֆո