Փաստ ինֆո

Դատախազությունը կքննարկի «Սիսական» ջոկատի հրամանատար Աշոտ Մինասյանի՝ Աշոտ Երկաթի նկատմամբ ընտրված խափանման միջոց կալանավորումը գրավով և չհեռանալու մասին ստորագրությամբ փոխարինելու մասին դատարանի որոշման դեմ բողոք ներկայացնելու հարցը։

Ինչպես արդեն տեղեկացրել ենք՝ Սյունիքի մարզի ընդհանուր իրավասության դատարանը՝ դատավոր Բորիս Բախշիյանի նախագահությամբ, հունվարի 26-ին բավարարել է Աշոտ Մինասյանի նկատմամբ ընտրված խափանման միջոց կալանավորումը փոփոխելու մասին միջնորդությունը՝ նրա նկատմամբ որպես խափանման միջոց կիրառելով գրավը՝ 2 մլն ՀՀ դրամի չափով և դրան համակցված՝ ստորագրությունը՝ չհեռանալու մասին։ Գրավի գումարը դատարանի դեպոզիտ հաշվին փոխանցելուց հետո Մինասյանն ազատ է արձակվել։

ՀՀ գլխավոր դատախազությունից «Փաստինֆո»-ին հայտնել են, որ դատական ակտը նոր է ստացվել, կուսումնասիրվեն պատճառաբանություններն ու հիմքերը, ըստ այդմ կլուծվի բողոք տանելու կամ չտանելու հարցը:

Հիշեցնենք, որ Աշոտ Մինասյանն ի սկզբանե մեղադրվում էր Նիկոլ Փաշինյանի նկատմամբ սպանության նախապատրաստության ենթադրյալ գործով, որը հարուցումից ավելի քան մեկ տարի անց կարճվել է։

Քրեական գործը հարուցվել էր Փաշինյանի կողմից ստորագրված կապիտուլյացիոն ակտից հետո, երբ պարբերաբար զանգվածային ընդվզումներ էին տեղի ունենում՝ ընդդեմ իշխանության գործողությունների, որոնք ճնշելու համար տեղի ունեցան մի շարք աղմկահարույց ձերբակալություններ։ Այդ օրերին ԱԱԾ-ն հայտարարեց, թե, իբր, Փաշինյանի նկատմամբ սպանության նախապատրաստություն է տեղի ունեցել ու 2020թ նոյեմբերի 15-ին, ԱԱԾ-ն ձերբակալեց ԱԱԾ նախկին տնօրեն, ընդդիմադիր գործիչ Արթուր Վանեցյանին, ՀՀԿ-ական գործիչ Վահրամ Բաղդասարյանին, Սիսական ջոկատիր լեգենդար հրամանատար Աշոտ Մինասյանին՝ «Աշոտ Երկաթի», դաշնակցական Աշոտ Ավագյանին։ Դատարանների որոշմամբ՝ վերջիններիս ձերբակալությունը ճանաչվել էր ոչ իրավաչափ, իսկ կալանավորման միջնորդությունները մերժվել՝ հիմնավոր կասկածի բացակայությամբ։

Ավելի քան մեկ արի անց հաստատվեց, որ քրեական գործի հարուցումը եղել է մտացածին եւ Վահրամ Բաղդասարյանի, Արթուր Վանեցյանի, Աշոտ Մինասյանի և Աշոտ Ավագյանի նկատմամբ ՝ Փաշինյանի սպանության նախապատրաստման և իշխանության յուրացման հատկանիշներով քրեական հետապնդումը դադարեցվել է՝ հանցակազմի բացակայության հիմքով։ Այլ խոսքով՝ վերջիններս այժմ ունեն արդարացվածի կարգավիճակ։ Ինչ վերաբերում է զենք-զինամթերքի դրվագին, ապա այժմ Մինասյանը մեղադրվում է միայն ՀՀ ՔՕ 235-րդ հոդվածի 1-ին մասով եւ հենց նշված դրվագով է նախաքննության ավարտ հայտարարվել, սակայն լեգենդար հրամանատարը շարունակում էր կալանքի տակ մնալ մինչեւ հունվարի 26-ը։

Նրան կալանքից ազատելուց հետո հայտնի դարձավ,որ քրեական հետապնդում է նախաձեռնվել հենց դատավորի նկատմամբ ու գլխավոր դատախազը միջնորդություններ է ներկայացրել ԲԴԽ՝ Սյունիքի մարզի ընդհանուր իրավասության դատարանի դատավոր Բորիս Բախշիյանի նկատմամբ քրեական հետապնդումն իրականացնելու և նրան ազատությունից զրկելուն համաձայնություն տալու վերաբերյալ։

Հեղինակ՝ Իզաբել Սահակյան

Աղբյուր` Փաստինֆո