Փաստ ինֆո

Հայաստանի Հանրապետությունն, այո՛, երբեք Թուրքիայի Հանրապետությանը հողային պահանջ չի ներկայացրել, բայց նաեւ երբեք չի ճանաչել 1921 թ Կարսի պայմանագիրը։ Այսօր նման հայտարարությամբ է հանդես եկել թուրքագետ Ռուբեն Մելքոնյանը՝ արձագանքելով ՀՀ վարչապետ Նիկոլ Փաշինյանին։

Հիշեցնենք, որ Ն. Փաշինյանը հունվարի 24-ի մամուլի ասուլիսի ժամանակ էր հայտարարել, որ Հայ Դատը երբեք չի եղել ՀՀ պետական քաղաքականության մի մաս։ Թուրքագետ Ռ. Մելքոնյանը նկատել է, որ իշխանությունների կողմից կատարվում է պարզ մանիպուլյացիա, աղավաղվում պատմական փաստերը։

«Հայաստանի Հանրապետությունն, այո՛, երբեք Թուրքիայի Հանրապետությանը հողային պահանջ չի ներկայացրել։ Հայաստանի Հանրապետությունը երբեք չի ճանաչել 1921 թ Կարսի պայմանագիրը։ Ինչո՞ւ Կարսի պայմանագիրը մենք չենք ճանաչում, քանի որ անօրինական պայմանագիր է, քանի որ ստորագրող կողմերը Թուրքիան և Բոլշևիկյան Ռուսաստանը,միջազգայնորեն ճանաչված պետություններ չեն եղել։ Կարսի պայմանագիրը լի է անօրինականություններով․ տարբեր տարածքներ՝ մայրաքաղաք Անին, Սուրմալուն և այլն, Թուրքիային են կցվել առանց որևէ իրավական հիմնավորման, նույնիսկ Ստալինը 1945 թ․ հայտարարել է, որ այդ պայմանագիրը ստորագրվել է այն ժամանակ, երբ Խորհրդային Միությունը թույլ էր։ Հայաստանն այդ գիծն է շարունակում և մենք չենք ճանաչել Կարսի պայմանագիրը»,- ընդգծել է Մելքոնյանը։

Նրա դիտարկմամբ՝ Թուրքիան բարդույթ ունի՝ Կարսի սինդրոմ, որ տարբեր տարիներին փորձել է հասնի Կարսի պայմանագրի ճանաչմանը և անօրինական ձևով խլված հողերի օրինականացմանը։ «Այսօր խնդիրն այն է, որ Թուրքիան պահանջում է Հայաստանը ճանաչի Կարսի պայմանագիրը։ Այսօրվա իշխանություններն ասում են որևէ խնդիր չկա, նախկինում էլ մենք պահանջ չենք ներկայացրել»,- ասում է թուրքագետն ու հավելում, որ եթե վաղն այս իշխանությունն այս հայ-թուրքական հարաբերությունների արդյունքում ճանաչի Կարսի պայմանագիրը, ապա փորձելու են ներկայացնել, որ նախկիններն էլ էին ճանաչում, այժմ մենք էլ շարունակում ենք․- «Սա սուտ է, սա կեղծիք է։ Այստեղ տարբերություններ կան՝ Կարսի պայմանագիր եզրույթը և տարածքային ամբողջականություն եզրույթը տարբեր բաներ են։

«Նույնիսկ Ցյուրիխյան արձանագրություններում գրված է եղել ոչ թե Կարսի պայմանագիրը, այլ որ Հայաստանը ճանաչում է գոյություն ունեցող սահմանները, գոյություն ունեցող սահմանները կարող ես ճանաչել, քանի որ այնտեղ սահմանային անցակետ պետք է դրվի, բայց դրանով չես զրկում քո ժողովրդին, քո պետությանը հետագայում հայտարարելու, որ այս անօրինականությանը երբեք համաձայնություն չենք տվել։ Փաշինյանը սուտ տեղեկություններ է փոխանցում հանրությանը»,- նշել է թուրքագետը։

Մանրամասները՝ տեսանյութում

Աղբյուր` Փաստինֆո