Փաստ ինֆո

Կառավարության այսօրվա նիստի օրակարգի մի շարք հարցերում ներառել ենք գյուղատնտեսական ոլորտին տրամադրվող օժանդակության ծրագրերի փոփոխության փաթեթ։ Կառավարության նիստի ժամանակ ասաց ՀՀ էկոնոմիկայի նախարար Վահան Քերոբյանը։

Նախարարը նշեց, որ ագրոպարենային ոլորտի սարքավորումների լիզինգի ծրագրի համար սահմանվել են նոր պայմաններ։ Կանխավճարի չափը սահմանվում է 20 տոկոս, լիզինգի տոկոսադրույքը բանկերի համար դրամով մինչև 12 տոկոս է, իսկ արտարժույթով՝ մինչև 9 տոկոս։
«Սուբսիդավորման արդյունքում տնտեսվարողին հասանելի կլինի դրամով՝ 2 տոկոս տոկոսադրույքով, իսկ արտարժույթով՝ 3 տոկոս տոկոսադրույքով։ Ձեռք բերվող սարքավորումների արժեքների հանրագումարը մեկ տնտեսվարողին մինչև 1 մլրդ դրամ է, իսկ մարման ժամկետը մինչև 5 տարի է»,-ասաց Վահան Քերոբյանը։

Հաջորդ ծրագիրը վերաբերում է ինտենսիվ այգեգործությանը և բարձրարժեք մշակաբույսերի մշակությանն է վերաբերում։ Այս ծրագրում վարկի տոկոսադրույքը մինչև 14 տոկոս է, իսկ սուբսիդավորման արդյունքում տոկոսադրույթը կլինի 2 տոկոս։

Վահան Քերոբյանը նշեց, որ ծրագրի շրջանակում վարկերը տրամադրվում են այգեհիմնման համար կես հեկտարից մինչև 200 հեկտար։
ՀՀ փոխվարչապետ Մհեր Գրիգորյանը նկատեց՝ որոշումների օրակարգում ներառված այս փաթեթով լավարկվում են գյուղոլորտի օժանդակության ծրագրերը։

Նախարարը հավելեց, որ այլ ծրագրեր էլ կներկայացվեն առաջիկայում, մասնավորապես գարնանացանի և կոնյակի արտահանման ու մթերումների հետ կապված ծրագրերը, որոնք նույնպես կներկայացվեն կառավարության հաստատմանը։
Մհեր Գրիգորյանն էլ ընդգծեց՝ այս ծրագրերը բավականին լուրջ խթան են հանդիսանում և բավականին լավ, բարենպաստ պայմաններ են առաջարկվում պոտենցիալ շահառուներին։

Փոխվարչապետը նաև կարևորեց, որ պոտենցիալ շահառուները պետք է հասկանան, թե որ դեպքում կարող են այս օժանդակություններից օգտվել։

Աղբյուր` Փաստինֆո