Փաստ ինֆո

«Սիսական» ջոկատի լեգենդար հրամանատար Աշոտ Մինասյանի՝ «Աշոտ Երկաթ»-ի պաշտպանը պահանջում է՝ վերացնել նկատմամբ ընտրված խափանման միջոցը կամ կալանավորումը փոխարինել անազատության հետ կապ չունեցող խափանման միջոց։

«Փաստինֆո»-ի թղթակցի հաղորդմամբ՝ Սյունիքի մարզի ընդհանուր իրավասության դատարանում՝ դատավոր Բորիս Բախշիյանի նախագահությամբ, «Սիսական» ջոկատի հրամանատար Աշոտ ՄԻնասյանի՝ «Աշոտ Երկաթի» գործով դատաքննության նախապատրաստման փուլում քննարկվում է Աշոտ Մինասյանի խափանման միջոցի հարցը։

Մեղադրող դատախազ Հայկ Երեմյանը միջնորդեց՝ անփոփոխ թողնել Աշոտ Մինասյանի նկատմամբ ընտրված խափանման միջոց կալանավորումը։ Վերջինս գտնում է, որ կալանավորման հիմքերը շարունակում են պահպանվել, առկա են մեղադրյալի կողմից դատավարության մասնակից վկաների վրա անօրինական ազդեցություն գործադրելու ռիսկ, մասնավորապես, Երեմյանը նշեց, որ դատակոչված վկաների մեծ մասը Աշոտ Մինասյանի հետ ունեն որոշակի մտերիմ հարաբերություններ և, օգտվելով դրանից, մեղադրյալը կարող է ապօրինի ազդեցություն ունենալ նրանց վրա։

Պաշտպան Միհրան Պողոսյանն էլ միջնորդեց՝ վերացնել Մինասյանի նկատմամբ ընտրված խափանման միջոցը կամ կիրառել անազատության հետ կապ չունեցող խափանման միջոց։ Փաստաբանն արձանագրեց, որ Մինասյանին կալանավորելու մասին Վերաքննիչ դատարանի որոշումից ակնհայտ է, որ որպես կալանավորման պայման, այսինքն, հիմնավոր կասկած արձանագրել է ՔՕ 235-րդ հոդվածի 2-րդ մասով առաջադրված մեղադրանքը, մինչդեռ, այժմ օբյեկտիվ իրականությունում նման մեղադրանք չունի, քննչական մարմինն այդ մեղադրանքից հրաժարվել է, որի օրինականությունը հաստատել է դատախազը, այսինքն՝ Մինասյանը գտնվում է կալանքի տակ, որը գոյություն չունի։ Պողոսյանի խոսքով՝ պետք է քննարկման ենթակա դառնա Մինասյանին այժմ մեղսագրված ՔՕ 235-րդ հոդվածի 1-ին մասի՝ հիմնավոր կասկածի շեմը հաղթահարած լինելու հանգամանքը, ինչը, սակայն շրջանցվեց դատախազի կողմից։ Պաշտպանության կողմը պնդում է, որ հիմնավոր կասկածի շեմը հաղթահարելու համար բավարար փաստական տվյալներ առկա չեն, նույնիսկ՝ ՔՕ 235-րդ հոդվածի 1-ին մասով։ Ըստ փաստաբանի՝ գործի քննությունը ենթադրությունների մակարդակով է եղել։ Պաշտպանության կողմը պնդում է, որ քրեական գործում ոչ միայն մեղքը հիմնավորող բավարար ապացույցներ առկա չեն, նույնիսկ՝ հիմնավոր կասկածի շեմը հաղթահարելու համար բավարար ապացույցներ ձեռք չեն բերվել։

Բացի այդ՝ վերագրվող արարքը միջին ծանրության հանցանք է, դատարանը պետք է հաշվի առնի նաև Աշոտ Մինասյանի անձը, մասնավորապես, որ նա 62 տարեկան է, առաջին անգամ է մեղադրվում հանցագործության կատարման մեջ, ունի մշտական բնակության վայր, խնամքին է գտնվում, որ մանկահասակ երեխաներ, որոնցից մեկն ունի առողջական խնդիրներ, թոշակառու և հաշմանդամություն ունեցող հայր, Մինասյանը նաև Արցախյան երեք պատերազմների մասնակից է, ունի նաև առողջական խնդիրներ։

Հիշեցնենք, որ Աշոտ Մինասյանն ի սկզբանե մեղադրվում էր Նիկոլ Փաշինյանի նկատմամբ սպանության նախապատրաստության ենթադրյալ գործով, որը հարուցումից ավելի քան մեկ տարի անց կարճվել է։

Քրեական գործը հարուցվել էր Փաշինյանի կողմից ստորագրված կապիտուլյացիոն ակտից հետո, երբ պարբերաբար զանգվածային ընդվզումներ էին տեղի ունենում՝ ընդդեմ իշխանության գործողությունների, որոնք ճնշելու համար տեղի ունեցան մի շարք աղմկահարույց ձերբակալություններ։ Այդ օրերին ԱԱԾ-ն հայտարարեց, թե, իբր, Փաշինյանի նկատմամբ սպանության նախապատրաստություն է տեղի ունեցել ու 2020թ նոյեմբերի 15-ին, ԱԱԾ-ն ձերբակալեց ԱԱԾ նախկին տնօրեն, ընդդիմադիր գործիչ Արթուր Վանեցյանին, ՀՀԿ-ական գործիչ Վահրամ Բաղդասարյանին, Սիսական ջոկատիր լեգենդար հրամանատար Աշոտ Մինասյանին՝ «Աշոտ Երկաթի», դաշնակցական Աշոտ Ավագյանին։ Դատարանների որոշմամբ՝ վերջիններիս ձերբակալությունը ճանաչվել էր ոչ իրավաչափ, իսկ կալանավորման միջնորդությունները մերժվել՝ հիմնավոր կասկածի բացակայությամբ։

Ավելի քան մեկ արի անց հաստատվեց, որ քրեական գործի հարուցումը եղել է մտացածին եւ Վահրամ Բաղդասարյանի, Արթուր Վանեցյանի, Աշոտ Մինասյանի և Աշոտ Ավագյանի նկատմամբ ՝ Փաշինյանի սպանության նախապատրաստման և իշխանության յուրացման հատկանիշներով քրեական հետապնդումը դադարեցվել է՝ հանցակազմի բացակայության հիմքով։ Այլ խոսքով՝ վերջիններս այժմ ունեն արդարացվածի կարգավիճակ։ Ինչ վերաբերում է զենք-զինամթերքի դրվագին, ապա այժմ Մինասյանը մեղադրվում է միայն ՀՀ ՔՕ 235-րդ հոդվածի 1-ին մասով եւ հենց նշված դրվագով է նախաքննության ավարտ հայտարարվել, սակայն լեգենդար հրամանատարը շարունակում է կալանքի տակ մնալ։

Դատարանը հեռացել է խորհրդակցական սենյակ՝ որոշում կայացնելու։ Այն կհրապարակվի այսօր՝ պատրաստ լինելուն պես։

Աղբյուր` Փաստինֆո