Փաստ ինֆո

Արայիկ Հարությունյանն այս իշխանության պատկերն է, լրիվ համապատասխանում է Նիկոլ Փաշինյանի ճաշակին: «Փաստինֆո»-ի հետ զրույցում նման դիտարկում արեց քաղտեխնոլոգ Վիգեն Հակոբյանը՝ անդրադառնալով մամուլում շրջանառվող տեղեկություններին, որ իշխող «Քաղաքացիական պայմանագիր» խմբակցությունը նախագահի պաշտոնում պատրաստվում է առաջադրել վարչապետի աշխատակազմի ղեկավար Արայիկ Հարությունյանին:

Ըստ Հակոբյանի, հաշվի առնելով իշխող ուժի կադրային բանկի աղքատությունը, շատ հնարավոր է, որ հենց Արայիկ Հարությունյանին էլ առաջադրեն նախագահի թեկնածուի պաշտոնում.

«Հաշվի առնելով, որ այսօրվա խորհրդարանական մեծամասնությունը վարում է Նիկոլ Փաշինյանի քաղաքական կուրսը, կապ չունի՝ ով կլինի նախագահի պաշտոնում, սակայն այս դեպքում, Արայիկ Հարությունյանն իր տեսակով լրիվ համապատասխանում է այս իշխանության պատկերին:Ըստ էության՝ իրենք ասում են՝ սա ենք մենք , մեր լավագույն կադրն էլ Արայիկ Հարությունյանն է»,-ասաց Վիգեն Հակոբյան:

Փորձագետի դիտարկմամբ՝ Արայիկ Հարությունյանը, նախագահ դառնալու դեպքում, անվերապահորեն կատարելու է Նիկոլ Փաշինյանի ցանկացած հրահանգ, քանի որ Փաշինյանին նվիրված քիչ մարդկանցից է.

«Արայիկ Հարությունյանը իշխող թիմի կարկառուն անդամներից է, այն քիչ մարդկանցից է, որոնք իսկապես նվիրված են Նիկոլ Փաշինյանին, նա լրիվ համապատասխանում է Նիկոլ Փաշինյանի քաղաքական ճաշակին, ընդհանրապես՝ Նիկոլ Փաշինյանի ճաշակին, ուստի կկատարի Փաշինյանի ցանկացած հրահանգ: ՔՊ-ի կողմից առաջադրված ցանկացած թեկնածու, ով էլ լինի, հլու-հնազանդ կատարելու է բոլոր հրահանգները: Փաշինյանն իր հարցազրույցում էլ ասել է՝ այն մարդը, որն առաջադրվելու է քաղաքական մեծամասնության կողմից, պետք է ապահովի օրենսդիրի, գործադիրի և նախագահի ներդաշնակությունը: Պարզ ասում է, որ ոչ թե իրար զսպող համակարգեր պետք է լինեն , այլ իրար լրացնեն, մեկը մյուսի արածը ծածկի, կամ՝ ավելացնի»,-ասաց զրուցակիցը հավելելով՝ ընդհանուր առմամբ սա մեկ համակարգ է լինելու, որն էլ կատարելու է մեկ մարդու հրահանգները:

Ըստ քաղտեխնոլոգի՝ Նիկոլ Փաշինյանը փորձում է իշխանության բոլոր ճյուղերն իր ձեռքը վերցնել և անձինիշխան համակարգ ստեղծել, ինչի մասին էլ փաստում է նաև Արայիկ Հարությունյանի հավանական նշանակումը.

«Սրա առաջին ծիլերը երևացին, երբ մոլի, կատաղի, երբեմն՝ ոչ լեգիտիմ պայքար էր գնում ՍԴ-ն վերցնելու համար, սրա վառ ապացույցը նաև այն է, որ այն տեղերում, որտեղ ՏԻՄ ընտրություններում իշխանությունը պարտվել է, փորձում է ուժային ռեսուրսներով, կալանավորումներով, տեռորի ենթարկելով համայնքներում բռնի ուժով իշխանությունը վերցնել»,-ասաց Վիգեն Հակոբյանը:

Աղբյուր` Փաստինֆո