Փաստ ինֆո

«Օդի տուրքի» վերաբերյալ որոշումն ընդունվել է դեռ 2 տարի առաջ, երբ «Ռայանէյր»-ը Հայաստանից պետք է չվերթներ իրականացներ։ Որոշման համաձայն, եթե վերջին մեկ տարում տվյալ ուղղությունը չի շահագործվել, ապա այդ ուղղությամբ չվերթներն ազատվում են «օդի տուրքից»։ «Փաստինֆո»-ի հետ զրույցի ժամանակ ասաց ավիացիայի ոլորտի փորձագետ Նավիկ Խաչատրյանը։

Վերջինս նշեց, որ Երևան-Ստամբուլ-Երևան չվերթներն «օդի տուրքից» ազատելը որևէ արտոնության հետ կապ չունի, պարզապես այս դեպքում ևս կիրառվում է 2 տարի առաջ ընդունված որոշումը։ Ավելի վաղ հայտնել էինք, որ Երևան-Ստամբուլ-Երևան չվերթների ուղևորները 3 տարով ազատվել են 10 000 դրամ «օդի տուրքից»։ Այս հրամանը հունվարի 20-ին ստորագրել է ՔԱԿ նախագահի պաշտոնակատար Միհրան Խաչատրյանը։ Արտոնությունը տրամադրել է «Pegasus Airlines» ավիաընկերությանը։

Ինչ վերաբերում է այս չվերթների տնտեսական բաղադրիչին, ապա Նավիկ Խաչատրյանի խոսքով այստեղ միանշանակ տնտեսական շահ առկա է, քանի որ կան տարատեսակ նավիգացիոն վճարումներ։

«Հայաստանում գտնվում է եվրոկոնտրոլի գոտում, որն այս տարածաշրջանի անվտանգության հետ կապված կազմակերպություն է և հավաքագրում է չվերթներից հետո անհրաժեշտ նավիգացիոն գումարները, իսկ հետո բաժանում այն ընկերություններին կամ երկրներին, որոնք դրա պոտենցիալ շահառուն են։ Այսինքն՝ եթե թուրքական ընկերությունն անցավ մեր օդային տարածքը և վայրէջք կատարեց հայկական օդանավակայանում, ապա այդ տարածքը շահագործելու համար՝ ըստ սահմանված նորմերի, գումարը պետք է հանձնի եվրոկոնտրոլին, իսկ վերջինս էլ ուղարկի Հայաստանին»,-նշեց փորձագետը։

Վերջինս նկատեց՝ կառավարությունն իրականում ճիշտ է ասում, որ հավելյալ գումարներ կառաջանան, երբ Թուրքիան սկսի չվերթներ իրականացնել, բայց փորձագետը նաև ուշադրություն է հրավիրում այն հանգամանքի վրա, որ թուրքերն ավիացիայից հեռու չեն և կարող են փոքր օդային հատվածով գնալ, որպեսզի քիչ գումար վճարեն։

Չնայած տնտեսական շահին՝ Նավիկ Խաչատրյանը գտնում է, որ նախքան Թուրքիային ՀՀ օդային տարածքով երթևեկելու թույլտվություն տալը, պետք էր համապատասխան քայլերի հաջորդականություն լիներ։ Պետք է գործեին համապատասխան ենթակառուցվածքներ, լինեին դիվանագիտական հարաբերություններ, որից հետո թույլ տային թուրքական օդանավերին վայրէջք կատարել ՀՀ-ում։

«Եթե մենք Թուրքիայի հետ չունենք նորմալ հարաբերություններ, դեսպանատուն, ապա այդ երկրի քաղաքացին Հայաստանի տարածքում կհայտնվի առանց որևէ մեկի աջակցության, և նույնն էլ մեր քաղաքացիների դեպքում կլինի՝ Թուրքիա ժամանելու դեպքում։ Այսինքն՝ բարդություններ կառաջանան»,-հավելեց Նավիկ Խաչատրյանը։

Աղբյուր` Փաստինֆո