Փաստ ինֆո

ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի փաստաբանները Վերաքննիչ քրեական դատարանի դատավոր Արմեն Դանիելյանին ինքնաբացարկի միջնորդություն են ներկայացրել։ Այս մասին «Փաստինֆո»-ին հայտնեց փաստաբան Երեմ Սարգսյանը՝ հավելելով, որ որոշումը կհրապարակվի վաղը՝ ժամը 09.30-ին։

Ինչպես արդեն տեղեկացրել ենք՝ Աղվան Հովսեփյանի նկատմամբ որպես խափանման միջոց ընտրված կալանավորումը ևս երկու ամսով երկարացնելու մասին որոշում է կայացվել, ինչի դեմ պաշտպանության կողմը վերաքննիչ բողոք է ներկայացրել, ինչը մակագրվել է Վերաքննիչ քրեական դատարանի դատավոր Արմեն Դանիելյանին։

Փաստաբան Երեմ Սարգսյանը «Փաստինֆո»-ի հետ զրույցում ասաց, որ նախապես միջնորդություն էր ներկայացվել դատարանին, որպեսզի վերջինս դատարանի նախագահից պարզեր, թե այդ օրը քանի բողոք է մուտքագրվել դատարան, բողոքների համարները և դրանցից յուրաքանչյուրը որ դատավորին է մակագրվել, ինչպես նաև՝ ապացույց, որ այբբենական կարգով է մակագրություն տեղի ունեցել, քանի որ ակնհայտ էր, որ բողոքը հատուկ տրվել է Դանիելյանին։ Նշված միջնորդությունը, սակայն, դատարանը չի բավարարել՝ գտնելով, թե նման հարցերը պարզաբանելու կարիք չկա, մինչդեռ, փաստաբանի գնահատմամբ՝ ակնհայտ է, որ չկա որևէ փաստական տվյալ, որ մակագրությունն այբբենական կարգով է եղել։ Պաշտպանության կողմը մանրամասն հիմնավորումներով ինքնաբացարկի միջնորդություն է ներկայացրել՝ պնդելով, որ Արմեն Դանիելյանը չի կարող լինել օրենքի հիման վրա ստեղծված դատարան, քանի դեռ չկա փաստական տվյալը, որ օրենքով մակագրություն է եղել։ Փաստաբանը վստահ է՝ դատարանը՝ ի դեմս Արմեն Դանիելյանի, մերժելու է միջնորդությունը, պաշտպանության կողմն էլ՝ կարձանագրի խախտումները։

«Արդեն գրեթե օրինաչափություն է, թե նմանատիպ հնչեղություն ունեցող գործերն ով պետք է քննի, դրանց դեմ ներկայացված վերաքննիչ բողոքը ով պետք է քննի։ Օրինաչափություն է Դանիելյան Արմենի կողմից դա քննելը, եթե ինքը չէ, ապա իրենից բացի եւս մեկ կամ երկու դատավոր կա, որոնց մակագրվում է»,- նշեց փաստաբանը։

Ըստ նրա՝ մակագրման կարգի խախտման կասկածները պետք է փարատվեն՝ դատարանի նախագահից համապատասխան տեղեկատվությունը պահանջելով։
«Եթե անգամ չես էլ փորձում պահանջել, ուրեմն՝ նույնիսկ համարձակություն չունես այդ տվյալը պահանջելու, ու՞ր մնաց վերջնական դատական ակտ կայացնես, իսկ եթե կասկած չի առաջանում՝ համակարգի հետ կապված, ապա ընդհանրապես լուրջ խնդիր կա՝ դատավորի՝ այլ գործերով մասնակցության վերաբերյալ»,- նշեց Սարգսյանը։

Ինքնաբացարկի միջնորդության հիմքում դրվել է մակագրման գործընթացում օրենքով սահմանված կարգի հնարավոր խախտման հանգամանքը, իսկ դատավոր Արմեն Դանիելյանի անձն առավել սրում է խնդիրը։

«Իրեն էլ տեղեկացրինք, որ քննիչների և դատախազների մոտ հրճվանք է, երբ բողոքը մակագրվում է Դանիելյան Արմենին, իսկ փաստաբանների, ամբաստանյալների կամ մեղադրյալների մոտ սուգ՝ ի սկզբանե։ Սա արդեն ձևավորված փաստ է, մեկ կամ երկու գործ չէ, սա իրողություն է, որ այդ մարդն ի վիճակի չէ՝ ինքն իր վրա ազդելու, որ օբյեկտիվ կամ անկախ որոշումներ կայացնի»,- նշեց Սարգսյանը։

Հիշեցնենք, որ Աղվան Հովսեփյանի վերաբերյալ գործով հայտարարվել էր նախաքննության ավարտի մասին, սակայն հետագայում պարզ դարձավ, որ դատախազը ցուցումով քրեական գործը հետ է ուղարկել լրացուցիչ քննության։ Հակակոռուպցիոն կոմիտեն նախ դժգոհեց՝ հայտարարելով, թե դատախազի ցուցումի կապակցությամբ առարկություններ են ներկայացվել, սակայն հետագայում հենց այդ ցուցումն էլ օգտագործվեց Ա. Հովսեփյանի կալանավորումը կրկին երկարացնելու միջնորդությունը պատճառաբանելու համար։ Նկատենք, որ առ այս պահը պաշտպանական կողմը տեղյակ չէ, թե ինչ քննչական գործողություններ կատարելու ցուցում է տրվել դատախազի կողմից, համենայն դեպս Ա. Հովսեփյանի մասնակցությամբ որեւէ քննչական գործողություն չի կատարվել։

Սա էլ, ըստ փաստաբանի, մեծ խնդիր է այն իմաստով, որ նախաքննությունն ավարտվել էր, այսինքն՝ քննիչը գտել էր, որ այլևս որևէ անելիք չունի, դատախազը ցուցումով ետ է ուղարկել՝ լրացուցիչ քննության, սակայն կալանքի ժամկետի երկարացման միջնորդության քննության ընթացքում այդ ցուցումները չեն ներկայացվեն դատարանին։ «Հարց է առաջանում՝ դատարանն ինչպես է պարզել, թե ինչ գործողություններ պետք է արվի, արդյոք այդ գործողությունների կատարման ընթացքում կա խոչընդոտման վտանգ և ինչ ժամկետով պետք է երկարացվի կալանքը։ Այս կարևոր հարցերը սկզբունքային են, չէր կարող որոշել՝ առանց ցուցումի բովանդակությանը ծանոթանալու, իսկ ցուցումը չի տրամադրվել։ Այսինքն՝ այս առումով ևս ակնհայտ է, որ լրջագույն խախտումներ կան»,- նշեց փաստաբանը։

Հիշեցնենք, որ Աղվան Հովսեփյանը ձերբակալվել է սեպտեմբերի 7-ին՝ առավոտյան։ Նախաքննական մարմինը շուրջ 1.5 տարի քննվող քրեական գործի շրջանակներում մեղադրանք է առաջադրել Հովսեփյանին և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան, որը դատավոր Մնացական Մարտիրոսյանի կողմից բավարարվել է։ Ընդ որում՝ մոտ 45 տարի իրավապահ կառույցներում ամենաբարձր ղեկավար պաշտոններ զբաղեցրած Աղվան Հովսեփյանին նախաքննական մարմինը չի կարողացել իր ծառայական գործունեության հետ կապված որևէ ապօրինություն մեղսագրել։ Նրան մեղադրանք է առաջադրվել ապօրինի ձեռնարկատիրական գործունեություն ծավալելու, ենթադրյալ փողերի լվացման հատկանիշներով։

Կալանավորման որոշումը կայացնելիս անգամ դատարանն արձանագրել է, որ բացակայում է քննությունից թաքնվելու հավանականությունը, ու որպես կալանավորման հիմք մատնանշել նրա նախկինում զբաղեցրած բարձր պաշտոնները, թե, իբր, կարող է ազդել քննության վրա՝ առանց որեւէ փաստացի օրինակ մատնանշելու։

Հեղինակ՝ Իզաբել Սահակյան

Աղբյուր` Փաստինֆո