Փաստ ինֆո

Նիկոլը «ծախում է» Հայոց ցեղասպանությունը՝ որպես հայկական ինքնության գործոն, թուրքերի վրա,- այսօր տեղի ունեցած մամուլի ասուլիսում հայտարարել է ՀՀԿ փոխնախագահ Արմեն Աշոտյանը՝ արձագանքելով Նիկոլ Փաշինյանի հունվարի 24-ի ասուլիսում հնչեցրած հայտարարությանը։
Հիշեցնենք, որ Ն. Փաշինյանը, մասնավորապես, նշել էր, թե Հայաստանի կառավարությունը երբեք Հայ Դատի քաղաքականություն չի վարել։

Ա. Աշոտյանն ընդգծել է, որ Հայաստանը երբեք տարածքային պահանջներ չի ներկայացրել Թուրքիայի, բայց հայոց Ցեղասպանության ճանաչումն ու դատապարտումը, այդ թվում Թուրքիայի կողմից եղել է ՀՀ պետականության քաղաքականության ուղղություններից մեկը։

«Մինչև Հայոց պետականության վերականգնումը, մինչև 3-րդ հանրապետությունը Հայոց ցեղասպանությունը բացառապես Սփյուռքի ջանքերով ճանաչել են Կիպրոսն ու Ուրուգվայը»,- հայտարարել է Աշոտյանն ու ավելացրել․- «Այնուհետև, երբ ունեցանք 3-րդ հանրապետություն և այդ հանրապետության քաղաքականության մեջ հատկապես Քոչարյան-Սարգսյան պաշտոնավարման 20 տարիների ընթացքում ուրվագծվեց ցեղասպանության միջազգային ճանաչման կարևորությունը»։

Նրա փոխանցմամբ՝ 20-ից ավելի պետություններ և մի քանի 10-յակ միջազգային կազմակերպություններ ճանաչել են Հայոց ցեղասպանությունը։

«Իհարկե, դա ստացվեց Սփյուռքի և պետության համատեղ ջանքերով, կրկնում եմ դա չի եղել միայն Սփյուռքի ջանքերով, եղել է պետության և Սփյուռքի համատեղ ջանքերով»,- արձանագրել է Աշոտյանը՝ հավելելով, որ Սփյուռքի ջանքերով միայն մի բան է եղել վերջին շրջանում,դա ԱՄՆ-ի կողմից ցեղասպանության միջազգային ճանաչումն էր։

«Ի՞նչ է նշանակում Հայոց պետությունը չի հետապնդում ցեղասպանության միջազգային ճանաչման խնդիրը, նա վախեցավ դրա մասին խոսել։ Նիկոլը «ծախում է» Հայոց ցեղասպանությունը՝ որպես հայկական ինքնության գործոն և պահանջատիրություն, թուրքերի վրա», ասում է Աշոտյանն ու դիմում հանրությանը․- «Արցախից մի մասդ ձեռքերներդ լվացիք, ցեղասպանությունից էլ ե՞ք լվանում, ցեղասպանության ուրացումն էլ է՞ ձեզ համար նորմալ և հիմա աշխարհից ինչ -որ բա՞ն ենք պահանջում»։

Մանրամասները՝ տեսանյութում։

Աղբյուր` Փաստինֆո