Փաստ ինֆո

Գործերի մակագրման էլեկտրոնային համակարգն առգրավել են, որ իրենց ցանկալի ձևով գործերի մակագրություն իրականացնեն և դա է պատճառը, որ կան դատավորներ, որոնք նմանատիպ հասարակական հնչեղություն ունեցող կամ իշխանական հետաքրքրություն ներկայացնող գործեր ընդհանրապես չեն քննում, անգամ այդ գործերի երեսը չեն տեսնում։ Այս մասին լրագրողների հետ զրույցում ասաց Ռուբեն Վարդազարյանի պաշտպան Երեմ Սարգսյանը։ 

Սարգսյանը նշեց, որ պետք է պարզել, թե արդյոք Ռուբեն Վարդազարյանի վերաբերյալ քրեական գործը՝ օրենքով սահմանված կարգով է մակագրվել։ Փաստաբանը վստահություն հայտնեց, որ թերի պատասխան է տրվելու, ու այդ դեպքում կքննարկվի դատավորի ինքնաբացարկի հարցը, որովհետև դատարանը պետք է լինի պատահական ընտրված, օրենքի հիման վրա ստեղծված, իսկ այն պահից, երբ կարգերը խախտվեց, դատարանը չի համարվում օրենքի վրա ստեղծված, ինչն արդար դատաքննության իրավունքի կոպտագույն խախտում է։
Ինչ վերաբերում է մակագրման համակարգի վերականգմանը, Սարգսյանն արձանագրեց՝ չգիտենք, թե մինչև երբ է այդպես լինելու, բայց իրավասու անձանց լսելու դեպքում հասկանում ենք, որ կարծես թե մեկ տարին էլ իրենց համար առանձնապես ժամկետ չէ, խնդրով կարծես թե չեն էլ անհանգստանում, վերացական հայտարարություններով փորձում են տպավորություն ստեղծել, թե իբր շահագրգռված են, բայց այդպիսի հանգամանք առկա չէ։

Անդրադառնալով Ռուբեն Վարդազարյանին առաջադրված մեղադրանքին՝ փաստաբանը նշեց, որ մեղադրանքն անհիմն է, սակայն այս պահին զերծ կմնա ապացույցների դաշտ մտնելուց՝ չբացահայտելու պաշտպանական մարտավարությունը, բայց մեկ բան հաստատ է՝ մեղսագրվող հանցանքն հիմնավորող ապացույցներ առկա չեն։

Դիտարկմանը, որ Ռուբեն Վարդազարյանը բազմիցս նշել է՝ իր նկատմամբ հետապնդում է իրականացվում՝ Ջհանգիրյանին ԲԴԽ նախագահի պաշտոնում նշանակելու համար, փաստաբանն արձագանքեց՝ նշելով, որ դա ակնհայտ էր. «Այն պրոցեսները, թե ինչպես էին անօրինական ձևով առաջ մղում Գագիկ Ջհանգիրյանի թեկնածությունը, թե ինչպես եղավ, որ Վարդազարյանի լիազորությունները կասեցվեցին։ Առաջին ատյանի դատարանը որոշեց, որ խախտում կա, պետք է վերացնել, այդ դատական ակտն անհապաղ կատարման ենթակա էր, չկատարելը հանցագործություն է, բայց չէր արվում՝ մինչև հասնեին իրենց նպատակին, մինչև Վերաքննիչ դատարանում հայտնի պարոն Արղամանյանը, որն այն դատավորներից է, որ երբ որևէ փաստաբան բողոք է ունենում Արղամանյանի մոտ, չի կարող որևէ նշույլ անգամ ունենալ օբյեկտիվության, որովհետև այնտեղ նստած է դատախազների դատախազ»։

Աղբյուր` Փաստինֆո