Փաստ ինֆո

Վանաձորի ավագանին այսօր՝ հունվարի 24-ին, արտահերթ նիստ է հրավիրել: Օրակարգում Վարչական դատարանում ավագանու շահերը ներկայացնելու համար լիազոր ներկայացուցիչ ընտրելու հարցն էր:

Նշենք, որ Վարչական դատարանը բավարարել էր «Լուսավոր Հայաստան» -ի միջնորդությունը և արգելք էր դրել Վանաձորում համայնքապետ ընտրելու օրակարգով նիստ հրավիրելու վրա:
Ավագանու նիստ անցկացնելու արգելքի վերացման հարցով դատական նիստը տեղի կունենա փետրվարի 3-ին:

«Փաստինֆո»-ի հետ զրույցում «Հայրենիք» կուսակցության Վանաձորի տարածքային կառույցի ղեկավար Վահե Դոխոյանը հայտնեց, որ Վանաձորի ավագանին այսօրվա արտահերթ նիստում որպես Վարչական դատարանում ավագանու շահերի ներկայացուցիչ է ընտրել փաստաբան Արտակ Ոսկանյանին.

« Արտակ Ոսկանյանը նախորդ 4 տարիների ընթացքում եղել է Վանաձորի ավագանու ներկայացուցիչը, քանի որ փորձ ուներ, նրա թեկնածությունն առաջադրեցինք , ինքն էլ դեմ չէր, ընտրվեց ավագանու շահերի ներկայացուցիչ»,-ասաց Վահե Դոխոյանը:

Ավելի վաղ «Փաստինֆո»-ն հայտնել էր, որ Վանաձորում «Քաղաքացիական պայմանագիր» կուսակցությունը, «Լուսավոր Հայաստան»-ի օգնությամբ, փորձում է համայնքային իշխանությունը զավթել:

ԼՀԿ-ն, որը դեկտեմբերի 5-ի ՏԻՄ ընտրությունների արդյունքներով Վանաձորում ստացել էր ընտրողների ձայների 3,97 տոկոսը և զբաղեցրել 6-րդ տեղը, դիմել էր Վարչական դատարան, որպեսզի անվավեր ճանաչվեն Վանաձորի համայնքապետի ընտրությունները, սակայն դատարանը մերժեց ԼՀԿ-ի հայցը։ ԼՀԿ-ն նաև առանձին միջնորդություն էր ներկայացրել Վարչական դատարան՝ պահանջելով պարտավորեցնել Վանաձոր համայնքի ավագանուն ձեռնպահ մնալ Վանաձոր միավորված համայնքի ղեկավար ընտրելուն ուղղված գործողություններից, այն է՝ համայնքի ղեկավար ընտրելու օրակարգով նիստ անցկացնելուց և ղեկավար ընտրելուց, ինչը բավարարվել էր։

Թեև դատարանն անփոփոխ է թողել Վանաձորի ՏԻՄ ընտրության արդյունքներն ամրագրող որոշումը, սակայն ավագանու աշխատանքները պարալիզացված են. ավագանին նիստ չի կարողանում անել, քանի որ չի վերացվել նիստ հրավիրելն արգելող դատարանի որոշումը։

Հիշեցնենք, որ Վանաձորում ՏԻՄ ընտրություններին մասնակցած 10 քաղաքական ուժերից 5-ն էին հաղթահարել անցողիկ շեմը։ «Մամիկոն Ասլանյան» դաշինքը ստացել էր 15 մանդատ, «Քաղաքացիական պայմանագիրը»՝ 9 մանդատ, Հայաստանի աշխատավորական սոցիալիստական կուսակցությունը՝ 5 մանդատ, իսկ «Հայրենիք» և «Ապրելու երկիր» կուսակցություններն՝ 2-ական մանդատ։

Աղբյուր` Փաստինֆո