Փաստ ինֆո

Արմեն Սարգսյանն իր հրաժարականի տեքստը կարող էր գրել նախագահ դառնալու հաջորդ օրը։ Նա լավ գիտեր, թե ինչ իրավունքներով, լիազորություններով և պարտականություններով է դառնում ՀՀ նախագահ։ «Փաստինֆո»-ի հետ զրույցի ժամանակ այս մասին ասաց ռազմական փորձագետ Հայկ Նահապետյանը։

Փորձագետը չի կարծում, որ Արմեն Սարգսյանի հրաժարականը կապված է ներքաղաքական գործընթացների, կամ էլ Թուրքիայի և Ադրբեջանի հետ կապված հարցերի հետ։

«Եթե փոխկապակցենք ներքաղաքականի հետ, ապա Արմեն Սարգսյանն ամեն օր՝ 24 ժամում 24 անգամ պետք է հրաժարական տար։ Այդ հիմնավորումներն իրականությունից զուրկ են։ Արմեն Սարգսյանները քաղաքական խոպանչիներ են։ Գալիս են ինչ-որ մի տեղ՝ գումար աշխատելու, պաշտոն զբաղեցնելու, հետո գնում են։

Սկզբունքորեն կարելի է ասել, որ քաղաքական խոպանչիները դուրս են գալիս Հայաստանից»,-ասաց փորձագետը։

Հարցին, թե ինչու՞ հենց հիմա Արմեն Սարգսյանը որոշեց հրաժարական տալ, Հայկ Նահապետյանը նշեց, որ դրա համար ինքը երկու տարբերակ է տեսնում։ Տարբերակներից մեկն այն է, որ ցանկանում են Արմեն Սարգսյանին փոխարինել, ընդ որում փոխարինել կրկին Անգլիայի արքունիքի հետ լավ հարաբերություններ ունեցող, փոխկապակցված, այդ թվում նաև բիզնես շահեր ունեցող անձով։

«Խոսքս Ռուբեն Վարդանյանի մասին է, որն Անգլիայի արքունիքի հետ բավականին սերտ, ջերմ հարաբերություններ ունի, և նրա սրտի թեկնածուն մարդու իրավունքների պաշտպան Արման Թաթոյանն է»,-նշեց փորձագետը։

Հայկ Նահապետյանը գտնում է, որ Արմեն Սարգսյանի հրաժարականն անուղղակի կապ կարող է ունենալ նաև Ղազախստանում տեղի ունեցած իրադարձությունների հետ։

Արևմուտքը տարեսկզբին փորձեց Ղազախստանում իշխանափոխություն իրականացնել՝ նպատակ ունենալով Ղազախստան-Ռուսաստան 7600 կմ ցամաքային սահմանը դարձնել անկայունության գոտի, իսկ հետո այդ քաոսն ուղղորդել Ռուսաստան։ Փորձագետի խոսքով, սակայն, Մեծ Բրիտանիա-Թուրքիա այդ օպերացիան ձախողվեց։

«Նուրսուլթան Նազարբաևի աղջիկը՝ Դարիգան, որը բավականին լուրջ ազդեցություն ունի Ղազախստանում, փոխկապակցված է բրիտանական ֆիրմաների հետ և բավականին ջերմ հարաբերություններ ունի նախկին նախագահ Արմեն Սարգսյանի հետ։ Երբ արևմուտքը, մասնավորապես Մեծ Բրիտանիան պարտություն կրեց Ղազախստանում, Տոկաևը քննություն սկսեց Նազարբաևի ակտիվների բացահայտման, օրինականության ճանապարհները ստուգելու ուղղությամբ։ Կարծում եմ՝ այդ գործընթացում հիշատակվելու է նաև Արմեն Սարգսյանի անունը»,-ասաց Հայկ Նահապետյանը։

Փորձագետի կարծիքով, եթե Ղազախստանի իշխանությունները գտնեին, որ իրենց երկրի ազգային հարստությունը, առաջին հերթին գազը, նավթը և ուրանն արտահանելիս ու վերամշակելիս բյուջեից դուրս գումարներ են առաջացել, որի մեջ նաև ներգրավվածություն է ունեցել Արմեն Սարգսյանն իր տարբեր կազմակերպություններով, ապա վաղ թե ուշ Արմեն Սարգսյանի հետ կապված հարցեր ևս կառաջանային։

«Պատկերացրեք, թե միջպետական հարաբերություններում, մասնավորապես ՀԱՊԿ անդամ երկու երկրների մեջ կոնֆլիկտային ինչ հարթություն է դա։ Որպեսզի այդ հարցերը չառաջանային, Արմեն Սարգսյանը հրաժարական տվեց։ Պատահական չէ, որ նա Լոնդոն գնաց և այնտեղից տարածեց հայտարարությունը։ Կարծում եմ՝շուտով նա կհրաժարվի նաև ՀՀ քաղաքացիությունից, մնալով Մեծ Բրիտանիայի քաղաքացի։ Նա մտածում է, որ այդ քաղաքացիության փաստաթուղթը անձեռնմխելիության որոշակի իրավունք կապահովի»,-նշեց փորձագետը։

Վերջինս հավելեց՝ գործընթացները շուտով ցույց կտան, թե որն էր հրաժարականի պատճառը։ Կա՛մ ՀՀ նախագահ կլինի Մեծ Բրիտանիայի հաջորդ ներկայացուցիչը, կա՛մ էլ Ղազախստանում Արմեն Սարգսյանի նկատմամբ քրեական գործեր կարող են հարուցվել, իսկ Արմեն Սարգսյանն իրեն ապահով կզգա միայն Մեծ Բրիտանիայի քաղաքացիության փաստաթղթով։

Աղբյուր` Փաստինֆո