Փաստ ինֆո

Զենքի մատակարարմամբ զբաղվող գործարար Դավիթ Գալստյանի՝ Պատրոն Դավոյի նկատմամբ ընտրված խափանման միջոց կալանավորումը գրավով փոխարինելու միջնորդությունը մերժելու որոշման դեմ բողոք կներկայացվի։ Այս մասին լրագրողների հետ զրույցում ասաց Դավիթ Գալստյանի պաշտպանական խմբի անդամ Արմեն Հարությունյանը՝ հավելելով, որ որոշումն իրավաբանության հետ աղերս չունի։

Փաստաբանն առաջարկեց, որ այսուհետ քրեական գործը կոչվի ոչ թե «Անորակ հրթիռների» գործ, այլ՝ կամ պարզապես «Անորակ» գործ, կա՛մ «Որակյալ հրթիռների» գործ, հետայսու, ամբողջ ուժերով փորձելու են հանրությանը ներկայացնել, որ այս ամենն իրավական պրոցեսներից դուրս է։

Հարցին՝ արդյո՞ք քաղաքական որոշում է, փաստաբանը նշեց, որ, եթե օրենսդրությամբ որևէ կերպ նախատեսված է անձին կալանքից ազատելու, ապա այս գործով բոլոր փաստական տվյալները կար։
«Երբ ասում ենք, որ սա իրավաբանություն չի, նկատի ունենք, որ այս պրոցեսներն օրենքի տրամաբանության մեջ չեն տեղավորվում՝ թե քաղաքական որոշում է, թե այլ շրջանակների արժեքների որոշում է՝ այս պահին զերծ կմնամ գնահատականներ տալու»,- նշեց Հարությունյանը՝ հավելելով, որ այս գործով անցնում է նաև քաղաքական դեմք և չի բացառվում, որ հնարավոր է նաև այդ ազդեցությունը լինի։

Նշենք, որ Երևանի ընդհանուր իրավասության դատարանը՝ դատավոր Մանվել Շահվերդյանի նախագահությամբ, Դավիթ Տոնոյանի, Ավետիք Մուրադյանի, Ստեփան Գալստյանի և Դավիթ Գալստյանի նկատմամբ ընտրված խափանման միջոց կալանավորումը թողել է անփոփոխ՝ մերժելով պաշտպանների միջնորդությունը։ Ամբաստանյալ Արտյոմ Համբարյանի նկատմամբ ընտրված խափանման միջոց կալանավորումը փոխարինվեց գրավով, որը դատարանի դեպոզիտ հաշվին փոխանցելուց հետո Համբարյանն ազատ կարձակվի։

Աղբյուր` Փաստինֆո