Փաստ ինֆո

Պաշտպանները ներկայացնում էին այն հիմնավորումները, որոնք վկայում էին, որ մեղադրվող անձինք այս պահին պետք է ազատ արձակվեն։ Լրագրողների հետ զրույցի ժամանակ այս մասին ասաց Ռազմական ավիացիայի նախկին պետ Ավետիք Մուրադյանի փաստաբան Երեմ Սարգսյանը։

Հիշեցնենք, որ այսօր ընթանում էր անպիտան հրթիռների գործով նիստը, որի շրջանակներում որպես մեղադրյալ ներգրավվել են Պաշտպանության նախկին նախարար Դավիթ Տոնոյանը, ԳՇ պետ Արտակ Դավթյանը, Ռազմական ավիացիայի նախկին պետ Ավետիք Մուրադյանը, Դավիթ Գալստյանը և ևս երեք անձ։

Փաստաբանը նշեց, որ իրենք ամեն կերպ փորձում էին հիմնավորում ստանալ, և յուրաքանչյուր ամբաստանյալի մասով ակնկալում են լսել, թե ինչ հիմք են տեսնում նրանց կալանքի տակ պահելու համար։

«Նշվում է, որ ազատության մեջ հայտնվելու դեպքում նրանք կարող են խոչընդոտել գործի քննությանը։ Ուզում ենք հասկանալ՝ ինչու յուրաքանչյուր մեղադրյալի դեպքում այս խնդիրը կա։ Եթե նախաքննության սկզբնական փուլում իրենք ասում էին, որ ապացույցների հավաքագրումը նոր է սկսվում, բարդ գործ է, հիմա այդ ապացույցները հավաքվել են։ Այսինքն բոլոր անձինք իրենց ցուցմունքները տվել են, ձեռք են բերվել բոլոր փաստաթղթերը և հիմա ասել, որ նրանց ազատության մեջ գտնվելու դեպքում հնարավոր է ինչ-որ փաստաթուղթ թաքցնել, աբսուրդ կարող է լինել»,-ասաց փաստաբանը։

Երեմ Սարգսյանը նկատեց՝ ամբողջ դատական պրակտիկան և նախադեպային իրավունքը վկայում է, որ արդեն դատաքննության փուլում խոչընդոտելու հավանականությունը կա՛մ վերանում է, կա՛մ շատ նվազ է լինում։ Փաստաբանի պնդմամբ մեղադրող կողմը հիմնավորում չի ներկայացնում, թե ինչու ամբաստանյալների խափանման միջոցը չի կարող փոխվել։

«Ես գտնում եմ՝ շատ ճիշտ են արել, որ Արտակ Դավթյանի նկատմամբ որևէ խափանման միջոց չեն կիրառել, որովհետև նման հիմք չկա, բայց նույն տրամաբանությամբ օրինակ Ավետիք Մուրադյանն ինչու՞ պետք է կալանքի տակ գտնվի, եթե նրա խոչընդոտման հետ կապված որևէ հիմնավորում չեն ներկայացնում»,-նշեց փաստաբանը։
Վերջինս հավելեց՝ ասում էին,որ հրթիռները չեն կրակվում և ոչ պիտանի են, բայց փաստաբանի խոսքով պատերազմի ժամանակ այդ հրթիռները կրակվել են, և որևէ մեկը չի կարող դա հերքել։

«Տպավորություն է, որ ընտրվում է, թե ում պետք է կալանավորեն, ում չպետք է կալանավորել։ Եթե օբյեկտիվ քննություն ենք ուզում, ուրեմն անձինք պետք է ազատության մեջ լինեն, քննությունը շարունակվի, և բոլորը տեսնեն՝ ինչ է տեղի ունենում»,-ասաց Երեմ Սարգսյանը։

Աղբյուր` Փաստինֆո