Փաստ ինֆո

Շարունակու՞մ եք մնալ այն կարծիքին, որ գերիների վերադարձի համար պետք է դիմել Պուտինին ու Ռուսաստանին, որովհետև նրանք են դրա համար պատասխանատու, թե՞ ձեր կարծիքը հիմա փոխել եք: ՀՌՀ անդամի ՔՊ-ական թեկնածու Արթուր Մանուկյանին նման հարց ուղղեց «Հայաստան» խմբակցության պատգամավոր Գեղամ Մանուկյանը:

Արթուր Մանուկյանն էլ հայտարարեց, թե Ռուսաստանի պատասխանատու գեներալը գնացել էր Բաքու՝ գերի բերելու, բայց այդպես էլ գերի չէր բերել.

«Լրագրողն ինձ դրանից հետո հարցրեց՝ գերիներին ինչու՞ չեք բերել, ես էլ ասացի՝ սխալ տեղ եք հարց տալիս, մարդը գնացել էր բերելու, չի բերել, գնացեք այդ մարդուն հարցրեք», -ասաց իմքայլական նախկին պատգամավորը:

Գեղամ Մանուկյանն էլ հայտարարեց, որ որպես դաշնակցական, չի քվեարկի Արթուր Մանուկյանի թեկնածությանը, քանի որ նրա խոսքում «երկիր կորցնելու հետ կապված որևէ ցավ չի տեսնում»:

Արթուր Մանուկյանն էլ արձագանքեց.

«Գեղամ, դու ինձ ճանաչում ես, պարզ է, չէ՞, որ ցավում եմ, դու կասկած չունես, չէ՞, որ ցավում եմ: Գիտեք, եթե մեր մեդիա դաշտում կրթական ֆակտորի վրա ուշադրություն դարձրած լինեին, մենք այսօր այս ամբիոնից նման տոնայնությամբ ոչ ես, ոչ էլ դուք չէինք խոսի, դա էլ է բացթողում: Գեղամ, դու ինձ 20 տարեկանից ճանաչում ես, դու կասկածու՞մ ես, որ ես ցավում եմ, չես կասկածում, ուղղակի դաշնակցական որոշում ունես, չես քվեարկելու, Գեղամ, «գրազ» կգամ, չես քվեարկելու նրա համար, որովհետև դու դաշնակցական ես, ուրիշ պատճառ չկա»,- հայտարարեց Ա. Մանուկյանը:

Աղբյուր` Փաստինֆո