Փաստ ինֆո

Ադրբեջանցիները ցանկություն չունեն որևիցե կերպ հետ քաշվել այնտեղից, որտեղ առաջացել են։ «Փաստինֆո»-ի հետ զրույցի ժամանակ ասաց ռազմական փորձագետ Հայկ Նահապետյանը։

Ավելի վաղ քաղաքագետ Անդրանիկ Հովհաննիսյանը տելեգրամյան իր ալիքում գրել էր, որ Ադրբեջանը մերժել է հայ-ադրբեջանական սահմանի սահմանազատման և սահմանագծման նպատակով զորքերի և ռազմական տեխնիկայի հայելային հետքաշման վերաբերյալ Հայաստանի իշխանությունների առաջարկը։

Հայկ Նահապետյանը նշեց, որ նման բաները սովորաբար պաշտոնական անձանց մակարդակով են հայտարարվում, իսկ ինքն այս պահին տեղեկություն չունի, որ Ադրբեջանը պաշտոնապես մերժել է հայելային հետքաշման առաջարկը։

«Հայելային պետք է հետ քաշվեին մինչև բնակավայրեր։ Նրանց բնակավայրերը շատ հեռու են, իսկ մեր բնակավայրերը սահմանին մոտ են։ Հիմա գնահատեք՝ իրենց ձեռնտու՞ է, եթե զորքերը հայելային տարբերակով քաշեն այդ հեռավորության վրա։ Տրամաբանորեն նրանց ձեռք չի տալիս և կարող են մերժել, բայց պաշտոնապես որևէ լուր չի հանդիպել»,-ասաց փորձագետը։

Հարցին՝ արդյոք ադրբեջանական կողմին ձեռնտու՞ է, որ սահմանազատման և սահմանագծման գործընթացը չիրականացվի, Հայկ Նահապետյանը նշեց, որ այսօր նրանց դա ձեռնտու չէ և սկզբունքորեն այդ գործընթացի ձախողման պատճառներն ավելի շուտ ադրբեջանական կողմինն են։

«Նրանք, սահմանում, մասնավորապես Սյունիքում, ունենալով որոշակի առավելություններ, ամեն ինչ անում են, որ հայկական բնակավայրերը հայաթափվեն։ Բռնություններ են գործադրում, անասնագողություն իրականացնում և ճնշումներ գործադրում այն մարդկանց նկատմամբ, որոնք գյուղատնտեսական աշխատանքով են զբաղվում։ Այսինքն` քանի դեռ սահմանազատում և սահմանագծում չի իրականացվել, նրանք ասում են՝ դե մեր տարածքն է, կիսված չէ։ Այդ առումով մայիսի 12-ից սկսած բավականին շատ տեղերում առաջխաղացումներ են ունեցել և ասում են, որ իրենց տարածքներն են եղել»,-նշեց Հայկ Նահապետյանը։

Վերջինս ընդգծեց՝ եթե սահմանները հստակ գծված լինեն, ապա ադրբեջանցիները չեն կարողանա շարունակել իրենց ապօրինությունները։ Եթե անեն ապօրինություններ, ապա միջնորդ կողմերը, մասնավորապես ՌԴ-ն կարձանագրեն այդ խախտումները։

«Ադրբեջանցիներին ձեռք է տալիս այն վիճակը, որտեղ իրենք հաղթողի, ուժեղի իրավունքով փորձում են մեզանից առավելագույնը վերցնել, էլ չեմ ասում Զանգեզուրի միջանցքի մասին։ Բայց որ դե ֆակտո դելիմիտացիա, դեմարկացիա արվում է, իրենց կողմից ցանկացած սահմանի խախտում ինքնաբերաբար արդեն հետևանքներ է ունենում և այդ հետևանքների պատասխանատվությունն ուղղակի թե անուղղակի նաև ՌԴ-ի վրա է՝ որպես միջնորդ կողմ»,-ասաց Հայկ Նահապետյանը։

Ռազմական փորձագետն ընդգծեց՝ ադրբեջանցիների բուն նպատակը սահմանամերձ բնակավայրերը հայաթափելն է։ Եթե 1-2 տարի սահմանամերձ բնակավայրերում ապրող գյուղացիները չկարողանան անասնապահությամբ զբաղվել, գյուղատնտեսական աշխատանքներով, հողի մշակումով զբաղվել, ապա վաղ թե ուշ այդ գյուղերը դատարկման վտանգի առաջ կկանգնեն։

«Ադրբեջանցիների ամբողջ գործունեությունը հարաբերական խաղաղությամբ այդ բնակավայրերը դատարկելն է։ Պատկերացրեք, եթե բնակավայրերը դատարկվում են, իսկ հաջորդ բնակավայրն էլ 20-30 կմ հեռավորության վրա են, իրենց այդ ժամանակ ձեռք է տալիս գործընթացը սկսել, իսկ հիմա ոչ»,-ասաց Հայկ Նահապետյանը։

Աղբյուր` Փաստինֆո