Փաստ ինֆո

Այս ձեւով չեք կարող մեզ ստիպել՝ սիրել Նիկոլ Փաշինյանին,-ոստիկանության բաժանմունքի մոտ հայտարարել է ադրբեջանագետ Արմինե Ադիբեկյանը, որին այսօր կրկին ոստիկանություն էին հրավիրել մեկ այլ գրառման համար։

Ա. Ադիբեկյանը նշել է, որ հրաժարվել է ոստիկանությունում բացատրություն տալ։

«Կտեսնենք՝ գործն ինչ ընթացք կստանա: Կարող եմ վստահ փաստել, որ ռեպրեսիվ ապարատը գնալով ավելի թափ է հավաքում եւ արդեն գործը դրել են հոսքի վրա: Այս գործերը գնալով բազմանալու են, որովհետեւ պատիժը շատ «համով» գումարներ են նախատեսում: Եթե նրանք կարողանան ամսական մի 100 հոգու դատել, մեր բյուջեի մի զգալի մասը լցնել մեր նման անձանց միջոցով»,- լրագրողների հետ զրույցում նշել է Արմինե Ադիբեկյանը:

Ըստ նրա՝ այսօրինակ քրեական գործեր հարուցելով, որ իշխանության նպատակը ոչ այնքան քրեական հետապնդումն է, որքան գումար աշխատելը:

«Էդ մարդիկ մեռան անպատվություն ուտելով, հայհոյանքներ ու վիրավորանքներ մարսելով դրսի մարդկանցից, բայց նրանցից փող չեն կարող մուրալ, իսկ երկրի ներսում որոշել են, որ շատ լավ է, համ անպատվությունը կուտենք, համ փող կաշխատենք: Ամեն գիշեր քնելիս մտածում են՝ Աստված ջան, նենց արա, վաղը մի 3-4 հոգի էլ ինձ հայհոյի, որ մի 2-3 մլն դրամ էդտեղից կպնի: Ես այլ բացատրություն չունեմ, որովհետեւ մարդը, որ մտածում է իր թասիբի ու պատվի մասին, լրիվ ուրիշ վարքագիծ է դրսեւորում, իսկ այս պարագայում նրանք դա բիզնես են սարքել»,- հայտարարել է Ադիբեկյանը:

Դիտարկմանը, որ ֆեյսբուքյան գրառումների համար նյութեր նախապատրաստելը, ոստիկանություն հրավիրելը գուցե նպատակ է հետապնդում նվազեցնել ադրբեջանագետի ֆեյսբբուքյան ակտիվությունը, որտեղ հաճախ հանդես է գալիս քննադատությամբ՝ Ա. Ադիբեկյանը նշել է՝ «Դա անհույս է: Քանի այս վարչակազմը ոչնչացնում է մեր պետականությունը, ոտնատակ է անում մեր ժողովրդի արժանապատվությունը, ինձ լռեցնելը մի ձեւ ունի, իսկ այդ դեպքում կունենան ավելի լուրջ խնդիրներ իրենց իսկ պատվիրատուի հետ, որովհետեւ պահպանել դեմոկրատների, մարդասերների իմիջը, ավելի կբարդացնեն իրենց կյանքը: Անհույս է, որ ես լռեմ՝ նայելով, թե ոնց են քանդում մեր երկիրը»:

Աղբյուր` Փաստինֆո