Փաստ ինֆո

Ադրբեջանի արտաքին գործերի նախարար Ջեյհուն Բայրամովը հանդիպել է ԵԱՀԿ գլխավոր քարտուղար Հելգա Շմիդտի հետ։ Վիեննայում կայացած հանդիպման ժամանակ Ադրբեջանի արտաքին գերատեսչության ղեկավարը շեշտել է, որ սահմանազատումը հարաբերությունների կարգավորման կարևոր բաղադրիչ է, և Բաքուն հանդես է գալիս այն անհապաղ և առանց նախապայմանների սկսելու օգտին։ Հայտնում են ադրբեջանական ԶԼՄ-ները։

«Ադրբեջանի և Հայաստանի միջև սահմանների դելիմիտացիան դիտարկվում է որպես երկու պետությունների միջև հարաբերությունների կարգավորման կարևոր տարր։ Ադրբեջանը կողմ է այդ գործընթացն առանց ձգձգումների սկսելուն։ Ցավոք, Հայաստանի մոտեցումն ու դիրքորոշումն այս հարցում և սահմանազատման գործընթացը սկսելու համար մի շարք նախապայմանների առաջադրումն անընդունելի են»։
Արտաքին գերատեսչության ղեկավարը գլխավոր քարտուղարին տեղեկացրել է, որ Ադրբեջանը հանդես է գալիս առանց որևէ նախապայմանի սահմանազատման գործընթաց սկսելու օգտին։

Հիշեցնենք, որ նախօրեին խորհրդարանում կառավարության հետ հարցուպատասխանի ժամանակ Հայաստանի արտգործնախարար Արարատ Միրզոյանը հաստատել է Սերգեյ Լավրովի հայտարարությունը, թե Երևանը Մոսկվայի միջոցով «սահմանազատման» մասին նոր առաջարկներ է ուղարկել Բաքու։ Խոսքը Սոթք-Խոզնավար հատվածում զորքերի հայելային հետքաշման մասին է, ընդ որում, «հիմք պետք է ընդունել Խորհրդային Հայաստանի և Ադրբեջանի սահմանները»,- ասել է Արարատ Միրզոյանը։ Որպես «առավելություն»՝ նա նշել է, որ եթե հայկական տարբերակին հետևեն, ապա ոչ մի բնակավայր կամ ճանապարհ ադրբեջանական ուժերի վերահսկողության տակ չի լինի։

Աղբյուր` Փաստինֆո