Փաստ ինֆո

Հեղափոխությունից հետո մեզ համար սկզբունքային կարևոր հարց է եղել Հայաստանում ժողովրդավարական իրավակարգերի հաստատումը, և մեզ համար կարևորագույն բարեփոխումներից մեկը եղել է պարեկային ոստիկանության հիմնադրումը։ Կառավարության նիստի մեկնարկին ասաց ՀՀ վարչապետ Նիկոլ Փաշինյանը։

Վարչապետը նշեց, որ արդեն 6 ամիս է, ինչ Հայաստանում գործում է պարեկային ոստիկանություն, որի շուրջ բավական դրական մթնոլորտ է ստեղծվել։

«Մեր աշխատանքային վերջին հանդիպման ժամանակ ամփոփել ենք պարեկային ոստիկանության աշխատանքի միջանկյալ արդյունքները, և ես կարծում եմ, որ դրանք արժանի են հրապարակման։ Մասնավորապես աշխատանքը համեմատել ենք ճանապարհային ոստիկանության առաջին սպայական գումարտակի աշխատանքի հետ։ Օրինակ Երևանի ճանապարհային ոստիկանության կողմից տրանսպորտային միջոցը ոչ սթափ վարելու համար կազմված արձանագրությունները եղել են 565-ը, իսկ պարեկային ոստիկանության կողմից կազմվել է 1917 արձանագրություն»,-նշեց Նիկոլ Փաշինյանը։

Նախկինում ճանապարհային ոստիկանությունը հաշվառման համարանիշի հետ կապված կազմել է 953 արձանագրություն, իսկ պարեկային ոստիկանության կողմից կազմվել է 3435 արձանագրություն։ Աճ է գրանցվել 3.5 անգամ։
Առանց վարորդական վկայականի վարելու համար նախկինում կազմվել է 924 արձանագրություն, իսկ պարեկային ոստիկանության կողմից՝ 4674 արձանագրություն։

«Կարևոր է արձանագրել, որ պարեկային ոստիկանությունը ևս մի ցուցանիշ է ճանապարհային երթևեկության հետ կապված։ Համեմատել ենք այս տարվա հունվարի տվյալները նախորդ տարվա հունվարի ատվյալների հետ։ Առանց ամրագոտի երթևեկելու համար նախկինում նույն ժամանակահատվածում 504 արձանագրություն է կազմվել, իսկ պարեկային ոստիկանության կողմից՝ 854 արձանագրություն է կազմվել»,-ասաց Նիկոլ Փաշինյանը։

Վերջինս ընդգծեց, որ պարեկային ոստիկանության գործառույթն է նաև հետևել ընդհանուր իրավակարգի պահպանմանը։ Վարչապետի խոսքով հանցագործություն կատարելու կասկածանքով նախկինում նման ծառայությունների կողմից ոչ մի մարդ բերման չի ենթարկվել, իսկ պարեկային ոստիկանության կողմից բերման է ենթարկվել 875 մարդ։

Աղբյուր` Փաստինֆո