Փաստ ինֆո

Այս պահին երկակի հարվածի տակ ենք՝ և՛ ներքին, և՛ արտաքին գնաճի։ Թանկացել են առաջնային օգտագործվող ապրանքատեսակները, օրինակ՝ պարենամթերքը, սննդամթերքը՝ մոտ 20 տոկոսով, կան ապրանքատեսակներ, որոնք թանկացել են 40-50 տոկոսով, որոշները՝ 10։ «Փաստինֆո»-ի հետ զրույցում ասել է «Սպառողների խորհրդատվության կենտրոն» ՀԿ ղեկավար Կարեն Չիլինգարյանը՝ նշելով, որ համաճարակի հետ կապված և՛ տնտեսական, և՛ ֆինանսական գնաճ կա նաեւ ամբողջ աշխարհում, և քանի որ մենք ներմուծող երկիր ենք, ինքնաբերաբար ընկնում ենք նաև այս գնաճի հոսքի մեջ։ 

Գնաճի վրա բացասական հետեւանքներ կունենա նաեւ գազի, ջրի, էլեկտրաներգիայի սակագների բարձրացումը։ «Ջուրը թանկացավ, էլեկտրաէներգիան կթանկանա փետրվարի մեկից, գազի հետ կապված էլ թաքնված խնդիրներ կան, որոնք քիչ-քիչ բացահայտվում են։ Սա շղթայական թանկացման կհանգեցնի»,- նշել է փորձագետը՝ ավելացնելով, որ գազի, ջրի սակագնի բարձրացումը պատճառ կդառնա ընդհուպ հացամթերքի թանկացման։ Իսկ համատարած գործազրկությունը, աշխատատեղերի կրճատումներն արդեն կանգնեցնում են աղքատության շեմին։

Տարիներ շարունակ մեզ մոտ աղքատությունը համարվել է 30 տոկոս, իսկ ոչ պաշտոնական տվյալներով հասնում էր 40-ի, հիմա եթե հետազոտություն անցկացվի և ճիշտ տեղեկատվություն տրվի, հնարավոր է պաշտոնապես 40 տոկոսի էլ հասնի։

Մասնագետի խոսքով՝ աղքատության շեմը միշտ բարձր է եղել Շիրակի և Գեղարքունիքի մարզերում, այժմ ավելացել է նաև հարավային հատվածը՝ սահմանների, ճանապարհահատվածների, պատերազմի հետևանքով։ «Սյունիքի մարզը հետընթաց ապրեց»,- նշել է Չիլինգարյանը ու ավելացրել, որ կան նաև քաղաքական խնդիրներ, որոնք բերում են տնտեսական վայրիվերումների, ազդում հասարակության վրա, կորել է վստահությունը։

Աղբյուր` Փաստինֆո