Փաստ ինֆո

Ռուբինյանին բանագնացի կարգավիճակով ես եմ օժտել. Այս մասին խորհրդարանում հայտարարեց Նիկոլ Փաշինյանը՝ պատասխանելով «Հայաստան» խմբակցության պատգամավոր Գեղամ Մանուկյանի հարցին, թե ո՞վ է կայացրել Ռուբեն Ռուբինյանին՝ թուրքիայի հետ հարաբերությունների կարգավորման համար հատուկ ներկայացուցիչ նշանակելու որոշումը։ 

Պատգամավորը հետաքրքրվեց նաև՝ կա արդյոք փաստաթուղթ Ռուբինյանի լիազորության, պարտականությունների մասին և ամեն անգամ հանդիպումներից հետո հաշվետվողականության ձևաչափի մասին տվյալներ հրապարակվելու են, թե ոչ։

«Ռուբեն Ռուբինյանին այդ կարգավիճակով օժտելու որոշումը ես եմ կայացրել, կայացրել եմ քաղաքական նպատակահարմարությունից ելնելով։ Ռուբինյանը հաշվետու է ինձ, ԱԽ-ին նաև մեծ հաշվով՝ ՀՀ ժողովրդին»։

Մանուկյանը մեկ անգամ էլ հարցրեց՝ արդյոք կա փաստաթուղթ, քանի որ թուրք բանագնացը երկրի նախագահի հրամանագրով է նշանակվել հատուկ բանագնաց։ Մանուկյանը մտավախություն ունի՝ գուցե Ռուբինյանը ինքնագլուխ որոշումներ կայացնի, իսկ հանրությունը ընդվզի, Փաշինյանի ստորագրությունը չի լինի և որևէ մեկը չի կարող ապացուցել, որ Փաշինյանն է որոշումը կայացրել։

«Անկախ նրանից, ով կբանակցի, ով կլինի բանակցողի կարգավիճակում, պարզ է՝ պրոցեսի ամբողջ պատասխանատվությունն անձամբ ես եմ կրում։ Ստեղ էս ինչի՞ մասին եք խոսում։ Ով ուզումա լինի։ Ես Ռուբեն Ռուբինյանին այդ լիազորություններով եմ օժտել՝ հաշվի առնելով անհրաժեշտությունը, որ ես այնտեղ նրա գործողությունների ամբողջ պատասխանատվությունը պիտի կրեմ։ Ես այդպես վարվել եմ, որ հանկարծ թաքնված, գաղտնի կուսակցականի հանկարծ այդ կարգավիճակով չօժտեմ, որ պետությանը զեկուցելու փոխարեն գա և զեկուցի ենթադրենք այլ երկրների ազդեցության գործակալներին։ Ես եմ կրում պատասխանատվությունը, ինչ խնդիր կա՝ լիազորել եմ և կրում եմ ու կրելու եմ պատասխանատվությունը»,- եզրափակեց Փաշինյանը։

Աղբյուր` Փաստինֆո