Փաստ ինֆո

«Պաշտոնական Ստեփանակերտի մոտեցումը գրեթե անփոփոխ է՝ ինչ տարիներ առաջ էր։ Երբ խոսում ենք ադրբեջանա-ղարաբաղյան հակամարտության մասին, կա երկու հարց՝ կարգավիճակն է և սահմանները, ուրիշ ոչ մի հարց չկա»,- այս մասին լրագրողների հետ զրույցում ասաց Արցախի արտաքին գործերի նախարար Դավիթ Բաբայանը։

Բաբայանը հայտարարեց՝ կարմիր գիծ է, Արցախը երբեք չի կարող լինել Ադրբեջանի կազմում, եթե նման բան լինի, ուրեմն Արցախ չի լինելու։
«Բացառում ենք Արցախի ենթակայությունը Ադրբեջանին՝ ինչպիսի կարգավիճակով էլ ուզում է լինի»։

ԱԳ նախարարը հիշեցրեց՝ հարցը պետք է կարգավորվի փաթեթային տարբերակով, այսինքն՝ բոլոր հարցերը կարգավորվեն միաժամանակ, սակայն Ադրբեջանն առաջ էր քաշում փուլային տարբերակը։

«Բայց իրենց փուլային տարբերակը տարբերվում էր նույնիսկ մեր կողմից առաջարկած որոշ փուլային բաղադրիչներից։ Օրինակ, իրենք ասում էին, որ պետք է վերականգնվի, այսպես կոչված, Ադրբեջանի տարածքային ամբողջականությունը, ինչ-որ շրջաններ էին ուզում որպես առաջին փուլ։ Մենք էլ ասում էինք՝ եթե փուլային եք ուզում, ապա սկզբում ճանաչեք մեր անկախությունը։ Բնական է, որ չեն գնացել դրան», - ասաց նախարարը։

Բաբայանը ոչ պակաս կարևոր խնդիր է համարում նաև փախստականների հարցը, որում Արցախի պատկերացումը չի փոխվել։ Երբեք չեն հրաժարվել փախստականների հարցը քննարկելուց, բայց ունեն հստկ մոտեցում։

«Առանց բոլոր քաղաքական հարցերի լուծման չի կարող խոսք լինել փախստականների մասին։ Պետք է կարգավորվեն բոլոր քաղաքական հարցերը՝ սահմանների, կարգավիճակի հարցը։ Եթե, օրինակ, փախստականը վերադառնում է Արցախ, ճանաչո՞ւմ է ինքը Արցախի Հանրապետությունը, վերադառնո՞ւմ է որպես ԱՀ քաղաքացի, թե ոչ։ Այդ դեպքում որտե՞ղ է վերադառնում»։

Երկրորդ կարևորագույն հարցն է, որ վերադարձը կարող է լինել միմիայն հայելային, այսինքն՝ հայերը վերադառնան նախկին Ադրբեջանական ԽՍՀ տարածք՝ Բաքու, Սումգայիթ, Կիրովաբադ, եթե չեն վերադառնում, չենք կարող միակողմանի այդ հարցը քննարկել։
«Բնական է, Ադրբեջանն ասում է՝ ոչ մի հայ չի վերադառնալու, իսկ իրենք պետք է վերադառնան ոչ թե նրա համար, որ մարդկանց զգացմունքները հարգեն, այլ որպեսզի ժողովրդագրական առումով Ղարաբաղը կլանեն»։

Բաբայանը հավելեց՝ կա հարց, որը ծուղակ է ու չպետք է մտնել դրա մեջ՝ դա Լեռնային Ղարաբաղի հանրապետության և ԼՂԻՄ-ի նույնականացումն է, որը շատ վտանգավոր է՝ լինի դա որպես կազմավորում, կամ սահմանների առումով։ Ցանկացած նույնականացման փորձ, կասկածի տակ է դնելու Լեռնային Ղարաբաղի հանարապետության լեգիտիմությունն առհասարակ։

Աղբյուր` Փաստինֆո