Փաստ ինֆո

Այսօր սկսվում է ՀՀ պաշտպանության նախկին նախարար Դավիթ Տոնոյանի, ԳՇ պետ Արտակ Դավթյանի, գործարար Դավիթ Գալստյանի (Պատրոն Դավո) գործով դատավարությունը, որը փաստաբանները պահանջում են անցկացնել դռնբաց։

«Փաստինֆո»-ի թղթակցի հաղորդմամբ՝ մինչ նիստերի դահլիճ մուտք գործելը Դավիթ Գալստյանի փաստաբանները պատասխանել են լրատվամիջոցների հարցերին՝ իրենց մտահոգությունները հայտնելով դատարանի օբյեկտիվության առումով։ Փաստաբան Արմեն Հարությունյանը հայտարարել է, որ քրեական գործերը մակագրման առկա ընթացակարգը իրենց եւս մտահոգության տեղիք է տալիս դատարանի, թե օբյեկտիվության, թե անկախության առումով ու կարծում է, որ հրապարակային դատավարությունն առկա կասածները փարատելու լավագույն միջոցն է։ Առավել եւս, որ գաղտնի տեղեկություններ այլեւս չկան, ամեն ինչ արդեն հրապարակվել է, այդ թվում հրթիռների տեսակները՝ Հ1-ի  եթերով։

Դառնալով հարցին, թե ԱԱԾ-ն ինչու՞ է մերժել հրթիռները փորձարկելու վերաբերյալ իր միջնորդությունը, Դավիթ Գալստյանի փաստաբանը նկատեց՝ մատակարարված զենք-զինամթերքի որակը պետք է պարզվեր սահմանված կարգով նշանակված մասնագետների փորձաքննության արդյունքում, ինչը չի կատարվել։

«Որոշ պաշտոնական անձինք կարող են տարբեր մեկնաբանություններ տալ, բայց մի պարզ իրականություն կա, եթե խոսում ենք որակի մասին, ապա պետք է լինեն համապատասխան մասնագետների կարծիքներ, որ այդ հրթիռներն անպիտան են։ Մինչդեռ և՛ նախաքննության փուլում, և՛ ավարտի փուլում բազմաթիվ փաստեր կան, որոնք վկայում են այն մասին, որ այդ հրթիռները պիտանիության հետ կապված խնդիր երբեք չեն ունեցել»,-ասաց Արմեն Հարությունյանը։

Վերջինս նշեց, որ վերջերս իրենց հարցմանն ի պատասխան Պաշտպանության նախարարությունը փաստել է, որ հրթիռների որակի հետ կապված որևէ խնդիր չկա։

«Վստահ եմ, որ այս փուլում պարզապես մեղադրական կողմը խուսափում է այդ փորձաքննությունից, քանի որ ավելի քան վստահ է՝ դրանց արդյունքները դրական կլինեն»,-ասաց փաստաբանը։

Ավելին, փաստաբանները նշեցին, որ դատախազությունը եւս ընդունել է, որ փորձարկման արդյունքում գուցե պարզվեր, որ որոշ հրթիռներ պիտանի են ու թերեւս դա է պատճառը, որ խուսափել են այդ քննչական գործողությունը կատարելուց։ 

Նշենք, որ նախապատրաստական նիստում ամենայն հավանականությամբ կքննարկվի գործով կալանքի տակ գտնվող մեղադրյալների՝ Դավիթ Տոնոյանի, Դավիթ Գալստյանի խափանման միջոցի հիմնավոր լինել կամ չլինելու հարցը։ 

Գործով մեղադրյալները 7-ն են՝ ՀՀ պաշտպանության նախկին նախարար Դավիթ Տոնոյան, ՀՀ ԶՈՒ ԳՇ պետ Արտակ Դավթյան, ՀՀ ԶՈՒ ԳՇ պետի նախկին տեղակալ Ստեփան Գալստյան, զենքի մատակարարմամբ զբաղվող գործարար Դավիթ Գալստյան՝ Պատրոն Դավո։

Նախնական քննության տվյալներով՝ ՀՀ ԶՈւ և ՀՀ ՊՆ բարձրաստիճան պաշտոնատար անձինք, չարաշահելով իրենց պաշտոնեական դիրքը, «Մոսթոն Ինժիներինգ» ընկերության սեփականատիրոջ հետ նախնական համաձայնությամբ, «Նեյտրոն ԳԱՄ» և «Բագավան» ՓԲ ընկերությունների մասնավորեցումից ընկերության կողմից ՀՀ պաշտպանության նախարարության հանդեպ ունեցած պարտավորությունը մարելու նպատակով, 2018թ. ընկերությունից ընդունել՝ ձեռք են բերել թվով 4232 հատ ժամկետանց, տեխնիկական պահանջներին չհամապատասխանելու պատճառաբանությամբ նախկինում չընդունված և ՀՀ ՊՆ-ում պահեստավորված ռազմամթերքը։

Ըստ նախաքննական մարմնի՝ վերը նշված անձինք ռազմամթերքի ձեռքբերման պայմանագրի կնքման համար առկա խոչընդոտները վերացնելու և իրենց գործողություններին օրինական տեսք տալու համար պայմանագրի մաս կազմող տեխնիկական բնութագիրը համապատասխանեցրել են փաստացի ՊՆ-ում ի պահ հանձնված ապրանքի տվյալ տեսակին՝ դրանում նշելով ռազմամթերքը գործարանային արկղերով ՀՀ ՊՆ N զորամասի կենտրոնական պահեստ մատակարարելու վերաբերյալ իրականությանը չհամապատասխանող տվյալներ։ Ընդ որում՝ նշված ռազմամթերքը ձեռք է բերվել նույն խմբաքանակից ռազմամթերքի նախկինում ձեռքբերման արժեքից գրեթե կրկնակի թանկ գնով՝ կատարելով առանձնապես խոշոր չափերով՝ 2,277,323,840 ՀՀ դրամին համարժեք, 4.655.200 ԱՄՆ դոլար գումարի հափշտակություն։

Դավիթ Տոնոյանին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով, Արտակ Դավթյանին՝ ՀՀ քրեական օրենսգրքի 375-րդ հոդվածի 3-րդ մասով, Ստեփան Գալստյանին՝ ՀՀ քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Ավետիկ Մուրադյանին՝ ՀՀ քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Վլադիմիր Բաբայանին՝ ՀՀ քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Արտյոմ Համբարյանին՝ ՀՀ քրեական օրենսգրքի 375-րդ հոդվածի 3-րդ մասով և 314-րդ հոդվածի 1-ին մասով, Դավիթ Գալստյանին՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով և 325-րդ հոդվածի 1-ին մասով։

Քրեական գործը մակագրվել է Երևանի ընդհանուր իրավասության դատարանի դատավոր Մանվել Շահվերդյանին։ 

Աղբյուր` Փաստինֆո