Փաստ ինֆո

Արտգործնախարար Արարատ Միրզոյանը վստահեցնում է, որ հայ-թուրքական հարաբերություների կարգավորման գործընթացը սկսելու համար կողմերը որևէ նախապայման չեն առաջադրել.

«Մինչ հայ և թուրք բանագնացների առաջին հանդիպումը մեդիադաշտում և սոցցանցերում փոթորիկ էր, թե ՀՀ կառավարությունը որոշակի նախապայմաններով գաղտնի գործընթացների մեջ է մտնում Թուրքիայի հետ:

Արդեն երկու կողմերի ներկայացուցիչների հանդիպումից հետո հրապարակված հաղորդագրոության մեջ հավաստվեց, որ հայ-թուրքական հարաբերություների կարգավորման գործընթաց սկսելու համար որևէ նախապայման կողմերը չեն դրել»,-ասաց ԱԳ նախարարը:

Արարատ Միրզոյանը նաև հայտնեց, որ ՀՀ հատուկ ներկայացուցիչ Ռուբեն Ռուբինյանի և Թուրքիայի հատուկ ներկայացուցչի հանդիպումը ճանաչողական բնույթ է ունեցել՝ որոշակի տեխնիկական և բովանդակային դետալների և հետագա ընթացքի վերաբերյալ:

Ինչ վերաբերվում է տեսակետին, որ Թուրքիան փորձելու է այս գործընթացը կապել «միջանցքային տրամաբանության հետ», Արարատ Միրզոյանը հայտարարեց, որ հայկական կողմի դիրքորոշումը հստակ է, Հայաստանը միջանցքային որևէ տրամաբանության չի համաձայնվելու.

«Դա մեզ համար անընդունելի է, մենք կողմ ենք տարածաշրջանային կոմունիկացիաների ապաշրջափակմանը, գիտակցում ենք, որ դրա արդյունքում ինչպես Հայաստանն է երկաթուղային և ավտոմոբիլային ճանապարհներ ստանալու Ադրբեջանի տարածքով, իսկ հայ-թուրքական սահմանների բացման դեպքում՝ նաև Թուրքիայի տարածքով, այնպես էլ Թուրքիան և Ադրբեջանը պետք է կարողանան օգտվել հայաստանյան ճանապարհներից»,-ասաց նա և ընդգծեց՝ կարևոր է, որ ցանկացած ճանապարհ, որից կօգտվի երրորդ կողմը, պետք է լինի այն երկրի սուվերենության և օրենսդրության ներքո, որի տարածքով ճանապարհն անցնում է:

Աղբյուր` Փաստինֆո